Surxondaryo viloyati Sho‘rchi tumanida 4-may kuni soat 09:30 larda mahalliy AYoQShlardan birining binosida payvandlash ishlarini olib borayotgan 52 yoshli erkak ehtiyotsizlik oqibatida og‘ir tan jarohati olib vafot etdi. Bu haqda Tergov departamenti xabar bermoqda.
Ma’lum qilinishicha, A.A. ismli payvandchi shoxobcha hovlisida joylashgan 20-25 tonnalik (25 kubometr hajmdagi) benzin va dizel yonilg‘isini saqlash uchun mo‘ljallangan sisterna ustiga bir o‘zi payvandlash uskunasini olib chiqqan. Erkak payvandlash ishlarini boshlagan vaqtida sisterna ichida yig‘ilib qolgan gaz va havo aralashmasidan chaqnash sodir bo‘lgan.
Kelib chiqqan yong‘in oqibatida A.A. butun tanasining 90-95 foizini termik kuyishi tashxisi bilan tibbiyot birlashmasining jonlantirish bo‘limida vafot etgan.
Mazkur holat yuzasidan Sho‘rchi tumani IIB huzuridagi Tergov bo‘limi tomonidan MChJ rahbariga nisbatan Jinoyat kodeksining 257-moddasi 2-qismi “a” bandi (odam o‘limiga sabab bo‘ladigan darajada mehnatni muhofaza qilish qoidalarini buzish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Eslatib o‘tamiz, 2020-yilda ham Surxondaryoda yonilg‘i sisternasini payvandlashga uringan erkak uning portlashi oqibatida vafot etgandi.
Izoh (0)