“Qoraqalpog‘iston qishloq xo‘jaligi va agrotexnologiyalar institutini tashkil etish chora-tadbirlari to‘g‘risida” hukumat qarori qabul qilindi, deya xabar bermoqda Adliya vazirligi.
Qarorga muvofiq, institut 2021/2022-o‘quv yilidan Toshkent davlat agrar universitetining Nukus filiali negizida tashkil etiladi.
Institutda ta’limning kredit-modul tizimi joriy etiladi, shuningdek, haftada besh kunlik o‘qish hamda haftaning shanba kuni mustaqil o‘zlashtirish kuni deb belgilanadi.
2022/2023-o‘quv yilidan institut tuzilmasida Germaniya Xalqaro hamkorlik tashkiloti bilan hamkorlikda “Geoaxborot tizimlari” markazi va laboratoriyasi tashkil etiladi.
Shuningdek, institut huzurida davlat muassasasi shaklidagi “Moyli ekinlar seleksiyasi, urug‘chiligi va yetishtirish agrotexnologiyalari” o‘quv-ilmiy markazi faoliyati yo‘lga qo‘yiladi.
Institutga xorijdan va respublikaning boshqa hududlaridan ishga taklif etilgan mutaxassislarga Nukus shahrida qurilayotgan arzon uy-joylar imtiyozli shartlar asosida ajratiladi.
Bundan avval Milliy gvardiya Harbiy-texnik instituti Jamoat xavfsizligi universiteti etib qayta tashkil etilgani, Qashqadaryo va Surxondaryoda Pedagogika institutlari tashkil etilishi hamda Toshkentda Diplomat university nomli xususiy universitet ochilishi kutilayotgani haqida xabar berilgandi.
Izoh (0)