Sirdaryodagi ta’lim muassasalari to‘liq 14 kunlik karantinga yopildi, deya xabar berdi viloyat sanitariya-epidemiologik osoyishtalik va jamoat salomatligi boshqarmasi.
“Viloyatimizning ayrim hududlarida kasallanish holati mavjud ekanligi inobatga olinib, COVID-19 infeksiyasi tarqalishining oldini olish maqsadida Yangiyer shahar 1-sonli Ixtisoslashtirilgan maktab internati, Boyovut tuman 2-sonli umumiy o‘rta ta’lim maktabi to‘liq 14 kun muddatga masofaviy (onlayn) o‘quv jarayoniga o‘tkazildi”, – deyiladi xabarda.
Shuningdek, boshqarma fuqarolarni ogohlikka ham chorlagan. Viloyatda aholi salomatligini mustahkamlash hamda viloyatdagi epidemiologik vaziyatning barqaror bo‘lishi uchun 2021-yil 18-aprelidan karantin qoidalari yanada kuchaytirildi.
Shunga ko‘ra, barcha ta’lim muassasalarida kasallanish holati aniqlangan taqdirda, ularning faoliyati zudlik bilan to‘xtatilib, onlayn ta’limga o‘tkaziladi. Muassasalar 2 hafta karantinga yopilib, barcha binolarda mukammal zararsizlantirish ishlari olib borilmoqda.
Ma’lumot uchun, shu kungacha Sirdaryo tumani Abu Ali Ibn Sino nomidagi jamoat salomatlik texnikumi, Guliston tibbiyot kolleji, Sirdaryo tumanidagi Temurbeklar maktabi, Yangiyer shahar tibbiyot kolleji, Mirzaobod tuman IDIM, Oqoltin tuman sanoat texnikumi, Guliston shahridagi 7-sonli, 11-sonli, 12-sonli va 15-sonli, Boyovut tumanidagi 1-sonli va 3-sonli, Sardoba tumanidagi 13-sonli umumta’lim maktablari to‘liq 14 kun muddatga masofaviy (onlayn) tizimga o‘tkazilgan.
Shuningdek, Guliston davlat universiteti ham to‘liq 14 kunlik masofaviy ta’limga o‘tkazilgan. Sirdaryodagi bolalar bog‘chasining 4 nafar tarbiyalanuvchisida kasallik alomatlari bo‘lib, to‘rtta holat Guliston shahrida, ularning uchtasi 9-sonli, bittasi esa 19-sonli maktabgacha ta’lim tashkilotlarida aniqlangan.
Eslatib o‘tamiz, O‘zbekistonda 28-aprel kuni 4 ta, 29-aprel kuni 2 ta hamda 30-aprel kuni 3 ta ta’lim muassasasi masofaviy ta’lim shakliga o‘tgandi.
Izoh (0)