Сирдарёдаги таълим муассасалари тўлиқ 14 кунлик карантинга ёпилди, дея хабар берди вилоят санитария-эпидемиологик осойишталик ва жамоат саломатлиги бошқармаси.
«Вилоятимизнинг айрим ҳудудларида касалланиш ҳолати мавжуд эканлиги инобатга олиниб, COVID-19 инфекцияси тарқалишининг олдини олиш мақсадида Янгиер шаҳар 1-сонли Ихтисослаштирилган мактаб интернати, Боёвут туман 2-сонли умумий ўрта таълим мактаби тўлиқ 14 кун муддатга масофавий (онлайн) ўқув жараёнига ўтказилди», – дейилади хабарда.
Шунингдек, бошқарма фуқароларни огоҳликка ҳам чорлаган. Вилоятда аҳоли саломатлигини мустаҳкамлаш ҳамда вилоятдаги эпидемиологик вазиятнинг барқарор бўлиши учун 2021 йил 18 апрелидан карантин қоидалари янада кучайтирилди.
Шунга кўра, барча таълим муассасаларида касалланиш ҳолати аниқланган тақдирда, уларнинг фаолияти зудлик билан тўхтатилиб, онлайн таълимга ўтказилади. Муассасалар 2 ҳафта карантинга ёпилиб, барча биноларда мукаммал зарарсизлантириш ишлари олиб борилмоқда.
Маълумот учун, шу кунгача Сирдарё тумани Абу Али Ибн Сино номидаги жамоат саломатлик техникуми, Гулистон тиббиёт коллежи, Сирдарё туманидаги Темурбеклар мактаби, Янгиер шаҳар тиббиёт коллежи, Мирзаобод туман ИДИМ, Оқолтин туман саноат техникуми, Гулистон шаҳридаги 7-сонли, 11-сонли, 12-сонли ва 15-сонли, Боёвут туманидаги 1-сонли ва 3-сонли, Сардоба туманидаги 13-сонли умумтаълим мактаблари тўлиқ 14 кун муддатга масофавий (онлайн) тизимга ўтказилган.
Шунингдек, Гулистон давлат университети ҳам тўлиқ 14 кунлик масофавий таълимга ўтказилган. Сирдарёдаги болалар боғчасининг 4 нафар тарбияланувчисида касаллик аломатлари бўлиб, тўртта ҳолат Гулистон шаҳрида, уларнинг учтаси 9-сонли, биттаси эса 19-сонли мактабгача таълим ташкилотларида аниқланган.
Эслатиб ўтамиз, Ўзбекистонда 28 апрель куни 4 та, 29 апрель куни 2 та ҳамда 30 апрель куни 3 та таълим муассасаси масофавий таълим шаклига ўтганди.
Изоҳ (0)