Qashqadaryoda 2020-yil va 2021-yilning birinchi choragida korrupsiya va budjet mablag‘larini talon-toroj qilish bo‘yicha 278 ta jinoyat sodir etilib, oqibatda 75 milliard so‘m budjet puli o‘zlashtirib olingan. Bu haqda viloyat prokurori Erkaboy Tojiyev ma’lum qildi, deya xabar berdi “Daryo” muxbiri.
Ma’lum bo‘lishicha, 30-aprel, juma kuni Qashqadaryo viloyati hokimligida Oliy Majlis Senati, Korrupsiyaga qarshi kurashish agentligi va Hisob palatasi hamkorligida viloyatda korrupsiyaning oldini olish, moliyaviy intizomni kuchaytirish, budjet daromadlarini oshirish va energiya resurslaridan qonuniy foydalanish bo‘yicha o‘rganishlar natijasiga bag‘ishlangan hisobot yig‘ilishi bo‘lib o‘tgan.
Unda so‘z olgan viloyat prokurori Erkaboy Tojiyev viloyatda budjet mablag‘larini talon-toroj qilishda “tashabbus ko‘rsatayotgan” tashkilotlar nomini oshkor qilgan.
“Budjet mablag‘larini talon-toroj qilish holatlari xalq ta’limi tizimida ko‘p bo‘lib, tizimda faoliyat yurituvchi xodimlar 14 milliard 600 million so‘m mablag‘ni o‘zlashtirgan bo‘lsa, sog‘liqni saqlash tizimida salkam bir milliard so‘m, maktabgacha ta’lim tizimida 312 million so‘m, tijorat banklarida 22 milliard 285 million so‘m, mahalla tizimida 2 milliard so‘m, xo‘jalik boshqaruvi tashkilotlarida 24 milliard 290 million so‘mni tashkil qilmoqda. Jami hisobda 75 milliard so‘m talon-toroj qilingan. Bu viloyat uchun kam mablag‘ emas”, — dedi viloyat prokurori.
Erkaboy Tojiyevning ma’lumot berishicha, viloyatda 75 milliard so‘mdan ortiq talon-torojlikka yo‘l qo‘yganlar 333 nafarni tashkil etib, 218 ta jinoyat ishi sudga oshirilgan, 60 ta jinoyat ishi bo‘yicha tergov harakatlari davom etmoqda.
“Korrupsiya holatlari asosan xalq ta’limi tizimida 83 nafar, tijorat banklarida 40 nafar, sog‘liqni saqlash tizimida 28 nafar, mahalla idoralarida 20 nafar va maktabgacha ta’lim tizimida 14 nafar shaxs tomonidan sodir etilgan. Prokuratura xodimlari tomonidan 2020-yil va 2021-yilning birinchi choragida davlat idora va tashkilotlarida o‘tkazilgan tekshirishlar davomida 401 nafar mansabdor qonun buzilishiga yo‘l qo‘ymasligi haqida ogohlantirilgan. 66 nafar mansabdor intizomiy, 259 nafar shaxsning ma’muriy javobgarligi hal etilgan. Qo‘pol qonunbuzilishi holatlari yuzasidan 26 ta jinoyat ishi qo‘zg‘atilgan”, — dedi Erkaboy Tojiyev.
Izoh (0)