Uzbekistan Airways may oyida Turkiyaga amalga oshiriladigan qator reyslarni bekor qildi

Uzbekistan Airways AJ epidemiologik vaziyat yomonlashuvi hamda Turkiya hukumati tomonidan 3 haftalik lokdaun e’lon qilingani sababli may oyida ushbu mamlakatga amalga oshiradigan qator reyslarini bekor qildi. Bu haqda O‘zbekistonning Istanbuldagi Bosh konsulxonasi xabar berdi.

Xususan, 14-may kuni Toshkent—Istanbul—Toshkent yo‘nalishi bo‘yicha amalga oshirilishi kerak bo‘lgan HY273-274 reyslari bekor qilingan. Shuningdek, O‘zbekistonning quyidagi viloyatlaridan amalga oshiriladigan reyslar ham vaqtincha to‘xtatildi:

• Samarqand—Istanbul—Samarqand yo‘nalishi bo‘yicha 5, 7, 10, 12 va 14-may kunlaridagi parvozlar;
• Farg‘ona—Istanbul—Farg‘ona yo‘nalishi bo‘yicha 1, 5 , 8, 12 va 15-may kunlaridagi parvozlar;
• Urganch—Istanbul—Urganch yo‘nalishi bo‘yicha 2, 9 va 16-may kunlaridagi parvozlar.

Avvalroq Rossiya 15-apreldan 1-iyungacha Turkiyaga doimiy va charter reyslarni to‘xtatishi haqida e’lon qilgandi. Shuningdek, Rossiya bilan bir qatorda Xitoy va boshqa mamlakatlar ham Turkiya bilan parvozlarni to‘xtatishga qaror qildi. Xitoy fuqaro aviatsiyasi ma’muriyati (CAAC) turk aviakompaniyalariga 19-apreldan boshlab to‘rt hafta davomida parvozlarni to‘xtatishga buyruq berilganini e’lon qildi.Eslatib o‘tamiz, Turkiya prezidenti Rajab Toyyib Erdo‘g‘on mamlakatda koronavirus epidemiyasining avj olishi munosabati bilan 29-apreldan 17-maygacha to‘liq lokdaun joriy etilishini e’lon qilgan edi. Cheklovlar 29-aprel, payshanba kuni soat 19:00 dan kuchga kiradi va 17-may, dushanba kuni soat 05:00 da tugaydi. Mamlakat turizm vaziri Nuri Ersoy ushbu lokdaun xorijlik sayyohlarga taalluqli bo‘lmasligini ma’lum qilgan.