Россия Италия элчихонасининг мудофаа ва ҳарбий масалалар бўйича ҳарбий атташеси ёрдамчисини persona non grata деб эълон қилди ва унга 24 соат ичида мамлакатдан чиқиб кетишни буюрди. Бу ҳақда Россия Ташқи ишлар вазирлигига таяниб, «Интерфакс» хабар берди.
Хабарга кўра, 26 апрель куни Италиянинг Москвадаги элчиси Паскуале Терраччано Россия Ташқи ишлар вазирлигига чақирилди ва унга элчихона ходимини «Италия ҳукуматининг Римдаги Россия элчихонаси ҳарбий атташесига қарши душманлик ва асоссиз ҳаракатларига жавоб» сифатида чиқариб юбориш тўғрисида нота топширилди.
31 март куни Италия карабинерлари томонидан Римда ўтказилган махсус операция давомида Россия фойдасига жосусликда гумон қилинган икки киши ҳибсга олинган эди. Кейинроқ Италия Ташқи ишлар вазирлиги жосуслик ишига алоқадорлиги тахмин қилинган Россия элчихонасининг икки ходими мамлакатдан чиқариб юборилиши ҳақида эълон қилди.
«Биз ушбу ўта жиддий ишга алоқадор икки россиялик амалдорнинг зудлик билан мамлакатдан чиқариб юборилиши тўғрисида маълум қиламиз», — деб ёзган вазир Facebook’даги саҳифасида.
Аввалроқ Болгарияда икки нафар россиялик дипломат жосусликда гумон қилиниб, Россияга қайтариб юборилган эди. Шунингдек, Швеция фуқароси Россия фойдасига жосусликда айбланиб, ҳибсга олинган.
Шунингдек, АҚШ киритган янги санкциялар фонида Россия ўн нафар америкалик дипломатни АҚШга қайтариб юборишини маълум қилган. Дипломатлар 21 майга қадар Россия ҳудудидан чиқиб кетиши шарт.
Россиянинг ташқи сиёсатида Польша, Болгария ҳамда Чехия билан муносабатларда ҳам кескинлик кузатилмоқда. Чехия 18 нафар россиялик дипломатни қайтариб юборишини билдирганидан кейин Россия ҳам 20 нафар чехиялик дипломатни Москвадан чиқариб юборган.
Изоҳ (0)