Namanganda 38 yoshli ayol 4 yoshli bolasi bilan o‘zini daryoga tashlagani yuzasidan jinoyat ishi qo‘zg‘atildi. Bu haqda viloyat prokuraturasi mas’ul xodimi Rustam Jalolov ma’lum qildi, deya xabar beradi “Daryo” muxbiri Azizbek Abduvaliyev.
2021-yil 22-aprel kuni soat 01:30 da ayol voyaga yetmagan farzandi bilan Uchqo‘rg‘on tumani hududidan oqib o‘tgan Norin daryosi bo‘yiga kelib, o‘zi va bolasini suvga tashlagandi. Ularni shu yerda xizmat vazifasini olib borayotgan Milliy gvardiya viloyat qo‘riqlash boshqarmasi xodimi hamda voqea joyidan o‘tib ketayotgan yo‘lovchi qutqarib qolgan.
Keyinchalik ona-bola tuman tibbiyot birlashmasiga olib borilgan va dastlabki yordam ko‘rsatilgan.
“Tergovga qadar teshiruv davomida ayolning bunday harakatlariga turmush o‘rtog‘i bilan oilaviy kelishmovchilik tufayli muntazam ravishda o‘zaro janjallashganligi sabab bo‘lganligi aniqlandi”, — deydi viloyat prokuraturasi xodimi.
Rustam Jalolovning bildirishicha, mazkur holat yuzasidan Uchqo‘rg‘on tuman prokuraturasi tomonidan Jinoyat kodeksining 103-moddasi 1-qismi (o‘zini o‘zi o‘ldirishga undash) bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq namanganlik ayol 2 nafar bolasini ko‘prikdan daryoga tashlamoqchi bo‘lgani, Shirin shahar hokimligi “hayotdan charchab”, ikki bolasini kanalga oqizib yubormoqchi bo‘lgan ayol voqeasi bo‘yicha izoh bergani, Navoiyda 31 yoshli ayol o‘zi va uch nafar qizining joniga suiqasd qilgani va uning eri doimiy ravishda ayolga o‘g‘il farzand tug‘magani uchun haqoratlab kelgani bunga sabab bo‘lgani haqida xabar berilgandi.
Izoh (0)