Наманганда 38 ёшли аёл 4 ёшли боласи билан ўзини дарёга ташлагани юзасидан жиноят иши қўзғатилди. Бу ҳақда вилоят прокуратураси масъул ходими Рустам Жалолов маълум қилди, дея хабар беради «Дарё» мухбири Азизбек Абдувалиев.
2021 йил 22 апрель куни соат 01:30 да аёл вояга етмаган фарзанди билан Учқўрғон тумани ҳудудидан оқиб ўтган Норин дарёси бўйига келиб, ўзи ва боласини сувга ташлаганди. Уларни шу ерда хизмат вазифасини олиб бораётган Миллий гвардия вилоят қўриқлаш бошқармаси ходими ҳамда воқеа жойидан ўтиб кетаётган йўловчи қутқариб қолган.
Кейинчалик она-бола туман тиббиёт бирлашмасига олиб борилган ва дастлабки ёрдам кўрсатилган.
«Терговга қадар теширув давомида аёлнинг бундай ҳаракатларига турмуш ўртоғи билан оилавий келишмовчилик туфайли мунтазам равишда ўзаро жанжаллашганлиги сабаб бўлганлиги аниқланди», — дейди вилоят прокуратураси ходими.
Рустам Жалоловнинг билдиришича, мазкур ҳолат юзасидан Учқўрғон туман прокуратураси томонидан Жиноят кодексининг 103-моддаси 1-қисми (ўзини ўзи ўлдиришга ундаш) билан жиноят иши қўзғатилиб, дастлабки тергов ҳаракатлари олиб борилмоқда.
Аввалроқ наманганлик аёл 2 нафар боласини кўприкдан дарёга ташламоқчи бўлгани, Ширин шаҳар ҳокимлиги «ҳаётдан чарчаб», икки боласини каналга оқизиб юбормоқчи бўлган аёл воқеаси бўйича изоҳ бергани, Навоийда 31 ёшли аёл ўзи ва уч нафар қизининг жонига суиқасд қилгани ва унинг эри доимий равишда аёлга ўғил фарзанд туғмагани учун ҳақоратлаб келгани бунга сабаб бўлгани ҳақида хабар берилганди.
Изоҳ (0)