Buxoroda maktab o‘quvchisi o‘g‘rilikka qo‘l urdi. IIB o‘quvchini barmoq izlari orqali topdi

Buxoro viloyat IIB axborot xizmati rahbari Shuhrat Jalolovning “Daryo”ga xabar berishicha, Kogon tumanida maktab o‘quvchisi tomonidan o‘g‘rilik sodir etilgan. Holat shaxsni avtomatlashtirilgan daktiloskopik identifikatsiya qilish tizimi orqali aniqlangan.

Ta’kidlanishicha, Kogon tuman ichki ishlar bo‘limiga “Beklar” mahallasida yashovchi, 1980-yilda tug‘ilgan A.G. murojaat qilib, xonadonida o‘g‘rilik sodir etilganini xabar bergan. Mazkur xabarnoma asosida tuman IIB tergov-tezkor guruhi tomonidan tezkor tadbir tashkil etilgan.

Holatga ko‘ra, noma’lum shaxs fuqaro A.G.ning yashash xonadoniga g‘ayriqonuniy ravishda kirib, uning yotoqxonasidan hamyoni ichida bo‘lgan 200 dollar, 2000 Rossiya rubli hamda bir dona bahosi 300 ming so‘mlik kumushdan yasalgan ayollar zanjirini o‘g‘irlagan.

Tergov-tezkor guruhi tomonidan hodisa sodir bo‘lgan joy ko‘zdan kechirilgan va qo‘l barmoq izlari tegishli tartibda hujjatlashtirib olingan. Holat yuzasidan noma’lum shaxsga nisbatan Jinoyat kodeksining 169-moddasi 2-qismi “g” bandi (o‘g‘rilik) bilan jinoyat ishi qo‘zg‘atilgan.

Jinoyat ishi bo‘yicha olib borilgan dastlabki tergov harakatlari davomida hodisa sodir bo‘lgan joydan olingan barmoq izlari yuzasidan daktiloskopik ekspertizasi tayinlangan. Barmoq izlari ustida Buxoro viloyati Ichki ishlar boshqarmasi Ekspert kriminalistika bo‘limi mutaxassis eksperti tomonidan kriminalistik tadqiqot o‘tkazilib, izlar shaxsni avtomatlashtirilgan daktiloskopik identifikatsiya qilish tizimi orqali tekshirilgan. Bunda 10 dona qo‘l barmoq izlarining uchtasi “Beklar” mahallasida yashovchi, 2005-yilda tug‘ilgan 9-sinf o‘quvchisi K.Sh.ning barmoq izlari bilan aynan bir xil ekanligi aniqlangan.

Shundan so‘ng voyaga yetmagan K.Sh. jinoyat ishi bo‘yicha gumon qilinuvchi sifatida tergovda ishtirok etishga jalb qilingan. U bilan olib borilgan tezkor surishtiruv va tergov harakatlari davomida ushbu jinoyatni maktab o‘quvchisi sodir qilgani to‘liq o‘z tasdig‘ini topgan.

Tergov-surishtiruv harakatlari davom etmoqda.