Бухоро вилоят ИИБ ахборот хизмати раҳбари Шуҳрат Жалоловнинг «Дарё»га хабар беришича, Когон туманида мактаб ўқувчиси томонидан ўғрилик содир этилган. Ҳолат шахсни автоматлаштирилган дактилоскопик идентификация қилиш тизими орқали аниқланган.
Таъкидланишича, Когон туман ички ишлар бўлимига «Беклар» маҳалласида яшовчи, 1980 йилда туғилган А.Г. мурожаат қилиб, хонадонида ўғрилик содир этилганини хабар берган. Мазкур хабарнома асосида туман ИИБ тергов-тезкор гуруҳи томонидан тезкор тадбир ташкил этилган.
Ҳолатга кўра, номаълум шахс фуқаро А.Г.нинг яшаш хонадонига ғайриқонуний равишда кириб, унинг ётоқхонасидан ҳамёни ичида бўлган 200 доллар, 2000 Россия рубли ҳамда бир дона баҳоси 300 минг сўмлик кумушдан ясалган аёллар занжирини ўғирлаган.
Тергов-тезкор гуруҳи томонидан ҳодиса содир бўлган жой кўздан кечирилган ва қўл бармоқ излари тегишли тартибда ҳужжатлаштириб олинган. Ҳолат юзасидан номаълум шахсга нисбатан Жиноят кодексининг 169-моддаси 2-қисми «г» банди (ўғрилик) билан жиноят иши қўзғатилган.
Жиноят иши бўйича олиб борилган дастлабки тергов ҳаракатлари давомида ҳодиса содир бўлган жойдан олинган бармоқ излари юзасидан дактилоскопик экспертизаси тайинланган. Бармоқ излари устида Бухоро вилояти Ички ишлар бошқармаси Эксперт криминалистика бўлими мутахассис эксперти томонидан криминалистик тадқиқот ўтказилиб, излар шахсни автоматлаштирилган дактилоскопик идентификация қилиш тизими орқали текширилган. Бунда 10 дона қўл бармоқ изларининг учтаси «Беклар» маҳалласида яшовчи, 2005 йилда туғилган 9-синф ўқувчиси К.Ш.нинг бармоқ излари билан айнан бир хил эканлиги аниқланган.
Шундан сўнг вояга етмаган К.Ш. жиноят иши бўйича гумон қилинувчи сифатида терговда иштирок этишга жалб қилинган. У билан олиб борилган тезкор суриштирув ва тергов ҳаракатлари давомида ушбу жиноятни мактаб ўқувчиси содир қилгани тўлиқ ўз тасдиғини топган.
Тергов-суриштирув ҳаракатлари давом этмоқда.
Мавзуга доир:
Изоҳ (0)