Navoiyda Zarafshon daryosi bo‘yidan 2020-yilning 15-iyulida 45 yoshli erkak jasadi topilgani, holat yuzasidan jinoyat ishi qo‘zg‘atilib, viloyat prokuraturasi, ichki ishlar boshqarmasi jinoyat qidiruv xodimlarining tezkor harakatlari natijasida gumonlanuvchilar qo‘lga olingani haqida xabar berilgan edi. Navoiy viloyati sudi jamoatchilik va OAV bilan aloqalar bo‘yicha bosh konsultanti Aziza Ro‘ziyevaning ma’lum qilishicha, qotillik sodir etgan shaxslarga nisbatan sud hukmi o‘qildi.
Mazkur holat yuzasidan olib borilgan tergovga qadar tekshiruv harakatlari davomida ushbu noma’lum shaxsning murdasi 1975-yilda tug‘ilgan Samarqand viloyati Paxtachi tumani “Dabusiya” mahallasida yashovchi T.Y.ga tegishli ekanligi aniqlangan.
Bolaligidan 1-guruh nogironi, aqli zaif, chap qo‘li va chap oyog‘i yoshligida ko‘mirdan qolgan cho‘g‘ga yiqilib tushib kuygan ushbu erkakni odamlarning ko‘nglida rahm-shafqat uyg‘otishini nazarda tutib, Karmana tumani yashovchi ayol 2 yildan buyon tilanchilik bilan muntazam shug‘ullanishga majbur qilib kelgan. Tilanchilikdan tushgan mablag‘ni o‘zi va qizi uchun kunlik ketadigan ehtiyojlarga sarflagan.
Ayolning o‘g‘rilik jinoyati uchun sudlanib, Navoiy shahar sudining hukmi bilan unga nisbatan tayinlangan axloq tuzatish ishlari jazosini o‘tayotgan 20 yoshli qarindoshi (erkak) 2020-yilning aprel oylarida uning uyiga yashash uchun ko‘chib borgan. Yigit Karmana tumanida plastik idishlarni to‘plab sotib, topgan pulining bir qismini yangasiga ijara uchun berib, yashab kelgan.
Xabarda aytilishicha, odatda aholi gavjum bozorlar atrofiga tilanchilik qilish uchun olib borilgan erkak so‘nggi kunlarda uydan tez-tez chiqib, boshi oqqan tomonga ketadigan, bir oz vaqt o‘tib, o‘zi yana qaytib keladigan odat chiqargan. Ayol 26 yoshli qizi va qarindosh yigitga erkakning uydan qochib ketishining oldini olish, uning tilanchiligi evaziga kelayotgan daromadni saqlab qolish maqsadida uni omborxonaga kiritib, ustidan qulflab qo‘yishni buyurgan.
Shunday qilib, erkak 2020-yil 12-iyundan 12-iyulga qadar havo haroratining issiqligi, inson yashashi uchun juda tor, hayoti va sog‘lig‘i uchun xavfli bo‘lgan kichik omborxonaga ustidan qulflab g‘ayriqonuniy ravishda ozodlikdan mahrum qilingan.
2020-yilning 12-iyul kuni soat 22:00 larda Sardorning baland ovozini eshitib, ayolning qizi va qaynukasi uning yoniga kirgan. Nogironligi sababli bunday sharoitda ushlab turilgani uchun qiynalgan erkak ularni haqorat qilgan. Bu haqoratdan jahli chiqqan yigit va qiz tilanchilik qiluvchi erkakni og‘zini ro‘mol bilan bog‘lab, tashqariga olib chiqib, oyog‘ini metall zanjir bilan, qo‘llarini ip bilan bog‘lab, o‘roq shaklidagi temir bo‘lagi bilan tanasining orqa va old qorin sohalari, qo‘l va oyoqlariga urib, unga tan jarohatlari yetkazgan. Ammo nogiron bo‘lishiga qaramasdan erkak ularga qarshilik ko‘rsatgan.
Shu sababli qiz va yigit o‘zaro jinoiy til biriktirib, erkakni qasddan o‘ldirishni maqsad qilgan. Yigit erkakning qo‘llarini mahkam ushlab turgan, qiz esa oyog‘i bilan uning bo‘yin sohasidan bosib turgan. Oqibatda erkak unga yetkazilgan og‘ir tan jarohatlari va yuqori nafas yo‘llarining berkilishi oqibatida voqea joyida vafot etgan.
Sodir etilgan qotillik jinoyatining oqibatidan va javobgarlikdan qutilish maqsadida jinoyat izlarini yashirish uchun ular erkakning jasadini oq rangli matodan tikilgan qopga solib, ashyoviy dalillarni yo‘q qilgan. Voqeadan xabar topgan ayol tezroq murdani yo‘qotishni buyurgan va murda solingan xalta eshak aravaga ortilib, jasad Zarafshon daryosiga tashlab yuborilgan.
Jinoyat ikki kunda fosh bo‘lgan. Sud majlisida sudlanuvchilar qilgan jinoyatlarini tan olgan. Yigit 17 yilga, qiz 13 yilga ozodlikdan mahrum qilindi. T.Y.dan tilanchilikda foydalangan va uni g‘ayriqonuniy ravishda ozodlikdan mahrum qilgan ayolga esa 5 yilga ozodlikdan mahrum qilish jazosi tayinlandi.
Izoh (0)