Moliya vazirligi yordamida UzAuto Motors AJ ilk bor 300 million dollar miqdorida xalqaro obligatsiyalarining chiqarilishi va xalqaro investorlar bilan telekonferensiyalar o‘tkazilishi haqida jahon moliya bozori ishtirokchilariga e’lon qildi. Bu haqda Moliya vazirligi matbuot xizmati xabar berdi.
Tashkillashtiruvchi bank-anderrayterlar Citi (AQSh), MUFG (Yaponiya), Natiksis (Fransiya) va Raiffeisen Bank International (Avstriya) kabi xalqaro miqyosda yetakchi banklardan iborat.
UzAuto Motors AJ xalqaro obligatsiyalarni chiqarish maqsadida S&P va Fitch xalqaro reyting agentliklaridan “B+” (“Barqaror” kutilma bilan) bahosiga ega bo‘lgan.
Shuningdek, 2021-yilning 22−27-aprel kunlari xalqaro investorlar uchun telekonferensiya (Global Investor Call) o‘tkazish va “yakkama-yakka” (one-on-one) formatida telekonferensiyalar davom etishi rejalashtirilgan hamda mazkur tadbirlarda bir qator davlatlar xalqaro investorlarining ishtirok etishi kutilmoqda.
Xalqaro investorlar qiziqishlari va moliya bozorlarining holatidan kelib chiqib, keyingi kunlarda buyurtmalar kitobi ochilishi va xalqaro obligatsiyalarning foiz stavkasi belgilanishi kutilmoqda.
Ma’lumot uchun, 2018−2020-yillarda Moliya vazirligi, “O‘zsanoatqurilishbank” ATB, “O‘zmilliybank” AJ va “Ipotekabank” ATIB tomonidan xalqaro obligatsiyalar chiqarilib, 2,65 milliard AQSh dollari miqdorida mablag‘lar xorijiy investorlardan jalb qilingan.
Mazkur tranzaksiya O‘zbekiston korporativ emitentlari orasida chiqarilayotgan birinchi xalqaro obligatsiya hisoblanadi.
Izoh (0)