“Yo‘llar yomonligi sabab 2 yil ichida sodir bo‘lgan 530 dan ortiq YTH oqibatida 191 kishi halok bo‘lgan” — Senat qo‘mitasi

O‘zbekistonda ta’mirlash ishlari olib borilayotgan, ta’mirlash ishlari oxiriga yetkazilmasdan qolib ketgan hamda ta’mirlanishi lozim bo‘lgan yo‘llarda ikki yildan kamroq vaqt ichida (2019-yilda va 2020-yilning 8 oyi) 532 ta YTH sodir bo‘lgan. Bu haqda Oliy Majlis Senati Mudofaa va xavfsizlik masalalari qo‘mitasi raisi Qutbidin Burhonov ma’lum qildi.

“Davlat yo‘l harakati xavfsizligi xizmati xodimlari tomonidan harakat xavfsizligini ta’minlash, yo‘l-transport hodisalarining oldini olish, harakat ishtirokchilariga qulayliklar yaratish yuzasidan mahalliy hokimliklar hamda tegishli tashkilot va idoralarga 2017—2020-yillar davomida jami 6709 ta taqdimnoma kiritilgan bo‘lsa-da, ularning 3173 tasi yoki 45 foizi belgilangan muddatlarda ijro etilmagan”, — deydi Qutbidin Burhonov.

Bundan tashqari, uning so‘zlariga ko‘ra, mutaxassislar tomonidan yo‘l-transport hodisalarining kelib chiqishiga sabab bo‘layotgan avtomobil yo‘llarini zarur darajada ta’mirlashga e’tibor qaratilmagani oqibatida 2019-yilda va 2020-yilning 8 oyi davomida 532 ta yo‘l-transport hodisasi sodir etilib, ularda 511 nafar fuqaro jarohatlangan va 191 nafar fuqaro halok bo‘lgan.

“Bu kabi kamchiliklar Davlat yo‘l harakati xavfsizligi xizmati xodimlari tomonidan kiritilayotgan taqdimnomalar ijrosini ta’minlamagan mutasaddilarga nisbatan ta’sirchan choralar ko‘rishni taqozo etmoqda”, — deya ta’kidlaydi qo‘mita raisi.

Avvalroq 2020-yilda Toshkent yo‘llarini yaxshilashga salkam 493 milliard so‘m yo‘naltirilgani to‘g‘risida xabar berilgandi.