Ўзбекистонда таъмирлаш ишлари олиб борилаётган, таъмирлаш ишлари охирига етказилмасдан қолиб кетган ҳамда таъмирланиши лозим бўлган йўлларда икки йилдан камроқ вақт ичида (2019 йилда ва 2020 йилнинг 8 ойи) 532 та ЙТҲ содир бўлган. Бу ҳақда Олий Мажлис Сенати Мудофаа ва хавфсизлик масалалари қўмитаси раиси Қутбидин Бурҳонов маълум қилди.
«Давлат йўл ҳаракати хавфсизлиги хизмати ходимлари томонидан ҳаракат хавфсизлигини таъминлаш, йўл-транспорт ҳодисаларининг олдини олиш, ҳаракат иштирокчиларига қулайликлар яратиш юзасидан маҳаллий ҳокимликлар ҳамда тегишли ташкилот ва идораларга 2017—2020 йиллар давомида жами 6709 та тақдимнома киритилган бўлса-да, уларнинг 3173 таси ёки 45 фоизи белгиланган муддатларда ижро этилмаган», — дейди Қутбидин Бурҳонов.
Бундан ташқари, унинг сўзларига кўра, мутахассислар томонидан йўл-транспорт ҳодисаларининг келиб чиқишига сабаб бўлаётган автомобиль йўлларини зарур даражада таъмирлашга эътибор қаратилмагани оқибатида 2019 йилда ва 2020 йилнинг 8 ойи давомида 532 та йўл-транспорт ҳодисаси содир этилиб, уларда 511 нафар фуқаро жароҳатланган ва 191 нафар фуқаро ҳалок бўлган.
«Бу каби камчиликлар Давлат йўл ҳаракати хавфсизлиги хизмати ходимлари томонидан киритилаётган тақдимномалар ижросини таъминламаган мутасаддиларга нисбатан таъсирчан чоралар кўришни тақозо этмоқда», — дея таъкидлайди қўмита раиси.
Аввалроқ 2020 йилда Тошкент йўлларини яхшилашга салкам 493 миллиард сўм йўналтирилгани тўғрисида хабар берилганди.
Изоҳ (0)