Namangan viloyatida 4 yoshli farzandini o‘ziga bog‘lab, Norin daryosida sakragan ayol qutqarib olindi, deb xabar beradi Milliy gvardiya matbuot xizmati.
Ma’lum qilinishicha, 22-aprel kuni tungi soat 01:20 larda Uchqo‘rg‘on tumanidan oqib o‘tuvchi Norin daryosi ustida joylashgan ko‘prik qirg‘og‘iga tushgan notanish ayol farzandi bilan birgalikda suvga o‘zini tashlab yuborgan.
Shu vaqtda ushbu hududda xizmat olib borayotgan Milliy gvardiya Qo‘riqlash boshqarmasi xodimi hamda voqea joyidan o‘tib ketayotgan yo‘lovchi fuqaro A.A. ayol va bolani qutqarib, tuman tibbiyot birlashmasiga olib borgan.
Olib borilgan dastlabki surishtiruvlar davomida ushbu ayol Uchqo‘rg‘on tumanida yashovchi 38 yoshli X.M. bo‘lib, u 2017-yilda tug‘ilgan farzandini o‘ziga bog‘lagan holda suvga tashlagani ma’lum bo‘lgan.
Hozirda mazkur holat yuzasidan Uchqo‘rg‘on tuman IIB tomonidan surishtiruv ishlari davom etmoqda.
Avvalroq namanganlik ayol 2 nafar bolasini ko‘prikdan daryoga tashlamoqchi bo‘lgani, Shirin shahar hokimligi “hayotdan charchab”, ikki bolasini kanalga oqizib yubormoqchi bo‘lgan ayol voqeasi bo‘yicha izoh bergani, Navoiyda 31 yoshli ayol o‘zi va uch nafar qizining joniga suiqasd qilgani va uning eri doimiy ravishda ayolga o‘g‘il farzand tug‘magani uchun haqoratlab kelgani bunga sabab bo‘lgani haqida xabar berilgandi.
Izoh (0)