Isroil Sog‘liqni saqlash vazirligi mamlakatda koronavirus bilan kasallanish darajasining pasayishi munosabati bilan aholiga ko‘chada himoya niqoblarini taqish majburiyatini bekor qildi. Bu haqda vazirlik veb-saytiga tayanib, “RBK” xabar berdi.
“Butun mamlakat bo‘ylab kasallanish darajasi pastligicha qolmoqda, shuning uchun aholiga ochiq havoda niqob taqish talabi bekor qilindi”, — deyiladi xabarda.
Shu bilan birga, mamlakat Sog‘liqni saqlash vazirligi odam gavjum bo‘lgan sharoitda niqob taqishni tavsiya qiladi. Bino ichida esa niqob taqish majburiy bo‘lib qolmoqda.
Avvalroq mamlakat rasmiylari koronavirusga qarshi emlangan xorijiy sayyohlarni Isroilga kiritish shartlarini ma’lum qilgan edi. Sayyohlar samolyotga chiqishdan oldin koronavirus uchun PZR-testidan o‘tishi kerak. Bundan tashqari, sayyohlar Isroil aeroportidan chiqib ketish uchun ikkinchi marta PZR-tekshiruvidan o‘tishi kerak, shuningdek, mamlakatga kelganlar emlangani yoki ilgari virusdan davolanganini tasdiqlash uchun antitanalar bo‘yicha tekshiruvidan o‘tishi lozim.
Isroil koronavirusga qarshi emlanganlar uchun 23-may kuni o‘z chegaralarini ochishini ma’lum qildi.
Mavzuga doir: Chechenistonda ham niqob taqmay yurishga ruxsat berildi va respublika hududiga kirish ochib qo‘yildi
Avvalroq koronavirusga chalingan bemorlar kelib tushmayotgani uchun, Isroil kasalxonalarida COVID-bo‘limlar yopilayotgani haqida xabar berilgandi. 30-mart kuni Rambam kasalxonasi birorta ham koronavirusga chalingan bemorni qabul qilmagan, bir oy avval esa bu yerga har kuni 15 nafardan bemor yotqizilar edi. Assuta va Meir kasalxonalarida ham shunga o‘xshash vaziyat kuzatilgan. Boshqa ba’zi shifoxonalarga koronavirusda gumon qilingan bir nafardan bemor kelib tushgan.
Isroilda eng ko‘p COVID-bemorlar yotgan, bir paytlar bir yo‘la 140 nafar bemor davolangan Hadassa kasalxonasi — Eyn-Kerem 30-mart kuni bor-yo‘g‘i uch nafar yangi bemorni qabul qilgan. Ta’kidlanishicha, ushbu vaziyat Isroilda aholining ommaviy emlanishi bilan bog‘lanmoqda.
Isroil aholini koronavirusga qarshi emlash tezligi bo‘yicha dunyoda yetakchi bo‘lib qolmoqda. “2021-yil marti oxiriga kelib, 16 yoshdan katta bo‘lgan isroilliklarning barchasi Pfizer/BioNTech vaksinasi bilan emlana oladi”, — deya mamlakat bosh vaziri Binyamin Netanyaxu fevral boshida e’lon qilgan edi.
Mavzuga doir:
- Rossiya Oliy sudi niqob rejimini bekor qilishni rad etdi. Da’vogarlarning bir qismi niqob taqmagani uchun sudga kiritilmadi
- AQShning Texas va Missisipi shtatlari niqob taqish majburiyatini bekor qildi va tadbirkorlar uchun cheklovlarni olib tashladi
- Udmurtiya Rossiya hududlari ichida birinchi bo‘lib niqob taqish majburiyatini bekor qildi
Izoh (0)