AQSh sobiq davlat kotibi lavozimini suiiste’mol qilishda ayblandi

AQSh Davlat departamenti sobiq davlat kotibi Mayk Pompeo va uning xotinini o‘z lavozimini suiiste’mol qilishda aybladi. Aniqlanishicha, er-xotin Davlat departamenti xodimlaridan yuz marotabadan ortiq o‘zining shaxsiy yumushini bajarishini so‘ragan. Bu haqda Politico nashri xabar berdi.

Ta’kidlanishicha, Vashington anchadan buyon bu tergovning o‘tkazilishini kutayotgan edi, lekin u faqat 2020-yilga kelibgina, Pompeo o‘sha paytda Davlat departamentining bosh inspektori bo‘lgan Stiv Linikning ishdan bo‘shatilishini uyushtirganidan so‘ng boshlandi.

Elektron pochta xabarlarini va boshqa hujjatlarni o‘rganish, xodimlar bilan suhbatlashish chog‘ida tergovchilar Mayk va Syuzan Pompeoning bo‘lim xodimlaridan go‘zallik salonlariga yozilish va restoranlarda joy band qilishdan tortib, kuchugini sayr qildirishgacha shaxsiy topshiriqlarini bajarishini so‘ragan ko‘plab vaziyatlarni aniqladi.

Masalan, sobiq davlat kotibining turmush o‘rtog‘i Pompeoning qo‘l ostida ishlaydigan xodimga dugonasi uchun futbolka sotib olishni va gul yetkazib berishni so‘ragan. Hisobotda yozilishicha, davlat kotibi xodimlariga, hattoki ish vaqtidan tashqari bajarilgan vazifalar uchun ham pul to‘lamagan.

Tergovchilar er-xotinning Davlat departamenti mablag‘larini diplomatik ahamiyatga ega bo‘lmagan, shaxsiy maqsadlardagi sovg‘alar sotib olish uchun ishlatgan holatlariga alohida e’tibor qaratdi (masalan, oltin yong‘oq to‘ldirilgan kosalar).

Avvalroq Pompeo va uning rafiqasi Syuzan 2018-yildan buyon siyosatchilar va ziyolilarni uyida yig‘ishni yaxshi ko‘rgan AQShning to‘rtinchi prezidenti Jeyms Medison sharafiga “Medison kechki ovqatlari” deb nomlangan dabdabali bazmlarni muntazam ravishda uyushtirib kelayotgani ma’lum bo‘lgan edi.

Bunday uchrashuvlarga eng boy ishbilarmonlar, Oliy sud sudyalari va taniqli siyosatchilar taklif qilingan. Ikki yil ichida 20 ga yaqin shunday tadbir tashkil etilgan, ularda 500 ga yaqin mehmon qatnashgan. Davlat departamentining manbalariga ko‘ra, bazmlar Pompeoning shaxsiy mablag‘lariga emas, balki soliq to‘lovchilarning pullari evaziga uyushtirilgan.

Avvalroq Braziliya Oliy sudi pandemiya sharoitida prezident Jair Bolsonaruning xatti-harakatlari ustidan tekshiruv olib borishni ma’qullagandi. Tergov jarayonida federal hukumatning sog‘liqni saqlash sohasidagi inqirozga munosabati tekshiriladi. Natijalarga qarab, tergov huquqni muhofaza qilish organlariga yuborilishi mumkin.

Shuningdek, Belarus davlat xavfsizlik qo‘mitasi 2020-yil avgust oyida bo‘lib o‘tgan prezidentlik saylovlarida ishtirok etgan sobiq nomzod Svetlana Tixanovskaya, Belarus muxolifati muvofiqlashtirish kengashi rayosatining a’zosi Pavel Latushko, shuningdek, yana 15 nafar fuqaroni terrorchilik faoliyatiga aloqador shaxslar va tashkilotlar ro‘yxatiga kiritdi.

Avstraliya bosh vaziri Skott Morrison bosh prokuror Kristian Porter va mudofaa vaziri Linda Reynoldsni o‘z lavozimlaridan chetlashtirdi. Ta’kidlanishicha, 2020-yil yozda politsiyaga kiritilgan anonim ariza yuzasidan Porter 16 yoshli qizni zo‘rlaganlikda ayblangan. Arizada aytilishicha, 1988-yilda 17 yoshda bo‘lgan Porter, o‘zi bilan debatda ishtirok etgan 16 yoshli qizni zo‘rlagan. Porterning o‘zi ayblovlarni rad etgan.