Rossiya tashqi ishlar vazirligi AQShning mamlakatga qarshi qo‘llagan yangi sanksiyalariga nisbatan javob harakatlari amalga oshirilganini xabar qildi.
Vazirlik saytidagi xabarda Rossiyadan 10 nafar amerikalik diplomat ortga qaytarilishi, mamlakat hududiga AQShdan qisqa muddatli safarlarga bir yil davomida 10 nafardan ko‘p amerikalik diplomatlarning kelishi taqiqlangani, AQSh diplomatik missiyalariga Rossiya va/yoki uchinchi boshqa bir mamlakat fuqarolari orasidan ma’muriy-texnik xodimlarni tanlab olishi va ishga yollashi taqiqlangani, 1992-yilda “Munosabatlarda ochiqlik va oshkoralik anglashuvi” memorandumining amal qilishini to‘xtatish, Rossiyadagi AQSh Davlat departamenti va boshqa davlat tuzilmalariga taalluqli fondlar va nodavlat tashkilotlarning faoliyatini to‘xtatish masalalari qayd etilgan.
Shuningdek, Rossiya TIV Vashington hamda Moskva elchilari vaziyatni tahlil qilish va maslahatlashuv o‘tkazish uchun o‘z mamlakatlari poytaxtida bo‘lishi lozim deb hisoblamoqda. Vazirlik sakkiz nafar ayni vaqtda lavozimida faoliyat olib borayotgan, sobiq amaldor hamda arboblarning Rossiya hududiga kirishini taqiqladi. Ular Rossiyaga qarshi siyosatda bevosita ishtirok etgani uchun sanksiyalar ro‘yxatiga kiritilgan.
Jumladan, FQB direktori Kristofer Rey, AQSh milliy razvedkasi direktori Evril Xeyns, mamlakat bosh prokurori Merrik Garland, Federal qamoqxonalar byurosi direktori Maykl Karvahal, ichki xavfsizlik vaziri Alexandro Mayorkas, prezidentning ichki siyosat bo‘yicha maslahatchisi, AQShning BMT masalalari bo‘yicha sobiq raisi Syuzan Rays, Tramp prezidentligi davrida uning milliy xavfsizlik masalalari bo‘yicha yordamchisi, AQShning BMTdagi doimiy vakili lavozimida ishlagan Jon Bolton va Markaziy razvedka sobiq direktori Robert Vulsiga Rossiya hududiga kirish taqiqlab qo‘yilgan.
Vazirlik uch nafar rossiyalik diplomatning Polshadan qaytarib yuborilishiga javoban besh nafar polshalik diplomat mamlakat hududidan chiqarib yuborilishini bildirgan.
Rossiya TIV AQShni qilmishlarining oqibati haqida mulohaza yuritishga va konrontatsion yo‘nalishdagi aloqalardan tiyilishga chaqirgan, aks holda Rossiya hukumati mamlakatdagi diplomatik missiyalar xodimlarining sonini 300 kishigacha kamaytirishini qayd etgan. Shuningdek, bayonotda diplomatlarda ham amerikaliklarni iqtisodiy tomondan qiynab qo‘ya oladigan kuch borligi ta’kidlangan.
“Hammasi bizning tanlov. AQSh bilan munosabatlar keskinlashuvini istamagan edik. AQSh bilan ikki tomonlama munosabatlarni me’yorlashtirish uchun xotirjam va professional muloqotga tayyormiz”, – deyilgan Rossiya tashqi ishlar vazirligining bayonotida.
Avval AQSh Rossiyaga qarshi yangi sanksiyalar joriy qilgan, mamlakat prezidenti Jo Bayden ushbu harakatni izohlab, Rossiya AQSh demokratiyasi yo‘lida g‘ov bo‘laversa, bundan keyingi choralarni ko‘rishga ham tayyorligini aytgandi. Xitoy TIV AQShning Rossiyaga qarshi sanksiyalarini “bir tomonlama” deb atab, ularni qoralagan.
Izoh (0)