AQShning Moderna farmatsevtika kompaniyasi 2021-yilning ikkinchi choragida o‘zining koronavirusga qarshi vaksinasini Kanada va Buyuk Britaniyaga rejalashtirilganidan kamroq yetkazib beradi. Bu haqda kompaniyaning CNN’ga bergan ma’lumotiga tayanib, “RBK” xabar berdi.
“Mavjud talab, ta’minot va taqsimotni hisobga olgan holda, Moderna ikkinchi chorakda bir qator mamlakatlarga, shu jumladan, Kanada va Buyuk Britaniyaga vaksina yetkazib berish hajmini kutilayotganidan kamaytiradi”, — deyiladi kompaniya xabarida. Moderna vaksina ta’minoti qanchaga kamayishi va bu tanqislikni qachon hal qilish mumkinligi haqida ma’lumot bermadi.
“Vaksina ishlab chiqarishni kengaytirish trayektoriyasi bir tekis emas va barcha sa’y-harakatlarga qaramay, Yevropa ta’minot zanjirida ilgari rejalashtirilgan dozalarning tanqisligi mavjud”, — deya kompaniyaning so‘zlarini keltirdi The Wall Street Journal.
“Vaksina ishlab chiqarish juda murakkab jarayon. Ta’minotning beqarorligiga esa bir qator omillar, jumladan, inson omili va moddiy resurslar sabab bo‘ldi”, — deya qo‘shimcha qildi Moderna. “Eng qisqa vaqtda” barqaror ta’minotni yaratish uchun kompaniya o‘z sherigi, Shveysariyaning Lonza kompaniyasi bilan ishlaydi va, shuningdek, “barcha hukumatlar bilan yaqin aloqada bo‘ladi”, deyiladi xabarda.
Koronavirus bilan kasallanganlar sonining keskin ortishini boshdan kechirayotgan Kanada Moderna vaksinasi yetkazib berilishining qisqarishi munosabati bilan “hafsalasi pir bo‘lganini” ma’lum qildi. “Bizning hukumat Moderna’dan o‘z majburiyatlarini bajarishini talab qilishda davom etadi”, — dedi Kanadaning jamoat ishlari va xaridlar vaziri Anita Anand. Uning so‘zlariga ko‘ra, aprel oyi oxirida kompaniya mamlakatga vaksinaning kutilganidan deyarli yarmi — 1,2 million dozaning o‘rniga 650 ming doza yetkazib bermoqchi.
Buyuk Britaniya va Kanadadan tashqari, Moderna koronavirusga qarshi vaksinani yetkazib berish bo‘yicha Yaponiya, Janubiy Koreya, Shveysariya, Isroil va boshqa bir qator mamlakatlar bilan shartnoma imzolagan. Yanvar oyi boshida Yevropa Ittifoqi tomonidan ushbu preparatni qo‘llash ma’qullangan edi.
Avvalroq Litvada 78 yoshli erkak koronavirusga qarshi Moderna vaksinasining ikkinchi dozasini olganidan so‘ng vafot etgani haqida xabar berilgandi.
Moderna biotexnika kompaniyasi o‘zi ishlab chiqargan vaksina ustida olib borilgan tadqiqotlardan so‘ng preparatning samaradorlik darajasini pasaytirdi. 2020-yil dekabr oyida Moderna vaksinasining samaradorligi 94,1 foizga baholangan edi. Hozir ma’lum bo‘lishicha, preparat 90 foiz holatda infeksiyani yuqtirishning oldini oladi, kasallikning og‘ir shaklidan esa 95 foiz himoya qiladi. 30 mingdan ortiq odamni qamrab olgan klinik sinovlarning uchinchi bosqichi natijalari bo‘yicha ushbu xulosaga kelingan.
Shuningdek, Moderna koronavirus vaksinasini olti oylikdan 12 yoshgacha bo‘lgan bolalarda sinashni boshlagan edi. Sinov jarayonida, taxminan, AQSh va Kanadadan 6750 nafar bola qatnashishi rejalashtirilgan.
Ma’lumot uchun, AQSh Oziq-ovqatlar va dorilar sifati bo‘yicha boshqarmasi (FDA) 18-dekabr kuni Amerikaning Moderna farmatsevtika kompaniyasi tomonidan ishlab chiqarilgan koronavirusga qarshi vaksinani mamlakatda qo‘llash uchun ruxsat bergan.
Izoh (0)