АҚШ собиқ давлат котиби лавозимини суиистеъмол қилишда айбланди

АҚШ Давлат департаменти собиқ давлат котиби Майк Помпео ва унинг хотинини ўз лавозимини суиистеъмол қилишда айблади. Аниқланишича, эр-хотин Давлат департаменти ходимларидан юз маротабадан ортиқ ўзининг шахсий юмушини бажаришини сўраган. Бу ҳақда Politico нашри хабар берди.

Таъкидланишича, Вашингтон анчадан буён бу терговнинг ўтказилишини кутаётган эди, лекин у фақат 2020 йилга келибгина, Помпео ўша пайтда Давлат департаментининг бош инспектори бўлган Стив Линикнинг ишдан бўшатилишини уюштирганидан сўнг бошланди.

Электрон почта хабарларини ва бошқа ҳужжатларни ўрганиш, ходимлар билан суҳбатлашиш чоғида терговчилар Майк ва Сюзан Помпеонинг бўлим ходимларидан гўзаллик салонларига ёзилиш ва ресторанларда жой банд қилишдан тортиб, кучугини сайр қилдиришгача шахсий топшириқларини бажаришини сўраган кўплаб вазиятларни аниқлади.

Масалан, собиқ давлат котибининг турмуш ўртоғи Помпеонинг қўл остида ишлайдиган ходимга дугонаси учун футболка сотиб олишни ва гул етказиб беришни сўраган. Ҳисоботда ёзилишича, давлат котиби ходимларига, ҳаттоки иш вақтидан ташқари бажарилган вазифалар учун ҳам пул тўламаган.

Терговчилар эр-хотиннинг Давлат департаменти маблағларини дипломатик аҳамиятга эга бўлмаган, шахсий мақсадлардаги совғалар сотиб олиш учун ишлатган ҳолатларига алоҳида эътибор қаратди (масалан, олтин ёнғоқ тўлдирилган косалар).

Аввалроқ Помпео ва унинг рафиқаси Сюзан 2018 йилдан буён сиёсатчилар ва зиёлиларни уйида йиғишни яхши кўрган АҚШнинг тўртинчи президенти Жеймс Медисон шарафига «Медисон кечки овқатлари» деб номланган дабдабали базмларни мунтазам равишда уюштириб келаётгани маълум бўлган эди.

Бундай учрашувларга энг бой ишбилармонлар, Олий суд судьялари ва таниқли сиёсатчилар таклиф қилинган. Икки йил ичида 20 га яқин шундай тадбир ташкил этилган, уларда 500 га яқин меҳмон қатнашган. Давлат департаментининг манбаларига кўра, базмлар Помпеонинг шахсий маблағларига эмас, балки солиқ тўловчиларнинг пуллари эвазига уюштирилган.

Аввалроқ Бразилия Олий суди пандемия шароитида президент Жаир Болсонарунинг хатти-ҳаракатлари устидан текширув олиб боришни маъқуллаганди. Тергов жараёнида федерал ҳукуматнинг соғлиқни сақлаш соҳасидаги инқирозга муносабати текширилади. Натижаларга қараб, тергов ҳуқуқни муҳофаза қилиш органларига юборилиши мумкин.

Шунингдек, Беларусь давлат хавфсизлик қўмитаси 2020 йил август ойида бўлиб ўтган президентлик сайловларида иштирок этган собиқ номзод Светлана Тихановская, Беларусь мухолифати мувофиқлаштириш кенгаши раёсатининг аъзоси Павел Латушко, шунингдек, яна 15 нафар фуқарони террорчилик фаолиятига алоқадор шахслар ва ташкилотлар рўйхатига киритди.

Австралия бош вазири Скотт Моррисон бош прокурор Кристиан Портер ва мудофаа вазири Линда Рейнолдсни ўз лавозимларидан четлаштирди. Таъкидланишича, 2020 йил ёзда полицияга киритилган аноним ариза юзасидан Портер 16 ёшли қизни зўрлаганликда айбланган. Аризада айтилишича, 1988 йилда 17 ёшда бўлган Портер, ўзи билан дебатда иштирок этган 16 ёшли қизни зўрлаган. Портернинг ўзи айбловларни рад этган.