Iordaniya qiroli Abdulloh II ga qarshi fitnada ishtirok etganlikda gumonlanayotgan sobiq valiahd shahzoda Hamza ibn Husayn monarxga sodiq qolishini ma’lum qildi. Bu haqda qirollik saroyi bayonotiga asoslanib, “RBK” xabar berdi.
Foto: Reuters
“Men o‘zimni Buyuk qirol hazratlarining qo‘liga topshiraman. Iordaniya Hoshimiylar qirolligi konstitutsiyasiga sodiq qolaman va har doim buyuk qirolga va uning valiahd shahzodasiga yordam beraman va ularni qo‘llab-quvvatlayman”,— deyiladi shahzoda Hamza tomonidan imzolangan maktubda.
Ta’kidlanishicha, qirol g‘azabiga uchragan shahzoda ushbu maktubni 5-aprel kuni qirolning amakisi shahzoda Hasan va qirol oilasining boshqa a’zolari bilan uchrashuvidan so‘ng imzolagan.
“Vatan manfaatlari hamma narsadan ustun turishi kerak. Barchamiz qirolni Iordaniya va uning milliy manfaatlarini himoya qilish borasidagi sa’y-harakatlarini qo‘llab-quvvatlashimiz kerak”, — deb qo‘shimcha qilgan shahzoda.
4-aprel kuni Iordaniya hukumati “mamlakat barqarorligiga tahdid” surishtiruvi doirasida qirollik sobiq valiahd shahzodasi va yana 20 ga yaqin odamni hibsga olgani xabar berilgan edi. Marhum qirol Husayn va uning to‘rtinchi rafiqasining to‘ng‘ich o‘g‘li shahzoda Hamza ibn Husayn Ammondagi o‘z saroyida uy qamog‘iga joylashtirilgan. Qirolni taxtdan ag‘darish maqsadidagi ehtimoliy fitnani tekshirish jarayonida sobiq valiahd shahzodaning davlat to‘ntarishiga urinishda xorijiy davlatlar bilan til biriktirgani ma’lum qilindi. Shuningdek, Qirol Husaynning bevasi, shahzoda Hamzaning onasi Nur al-Husayn o‘g‘liga qarshi ayblovlarni “yovuz tuhmat” deb da’vo qildi.
Davlat to‘ntarishiga urinish haqidagi xabarlar fonida AQSh, BAA va boshqa mamlakatlar Iordaniya qirolini qo‘llab-quvvatlashini ma’lum qildi.
