Shavkat Mirziyoyev Samarqandga qilgan safarini yakunlab, Toshkentga qaytib keldi

Shavkat Mirziyoyev Samarqand viloyatiga ikki kunlik safarini yakunlab, Toshkentga qaytib keldi, deya xabar bermoqda Prezident matbuot xizmati.

Safar davomida Prezident Samarqand xalqaro aeroportidagi qurilish ishlarini, Imom Buxoriy yodgorlik majmuasini kengaytirish bo‘yicha amalga oshirilayotgan ishlarni ko‘zdan kechirdi. Shuningdek, Samarqandning Qorasuv mavzesida qurilgan ko‘p qavatli uylarni va turizm markazini borib ko‘rdi.

Shu bilan birga, Shavkat Mirziyoyev O‘zbekistonning Birinchi Prezidenti Islom Karimov qabrini ziyorat qildi.

Bundan tashqari, viloyatda tashkil qilingan yangi koroxona va boshqa sanoat fabrikalarini ko‘zdan kechirdi. Xususan, “Urgut” erkin iqtisodiy zonasidagi korxonalar faoliyati bilan tanishdi, Sag Agro mas’uliyati cheklangan jamiyatining “in vitro” laboratoriyasini borib ko‘rdi.  Shundan so‘ng Prezident viloyat faollari bilan yig‘ilishda ishtirok etdi.

Yig‘ilishda “Urgut” EIZning yanada rivojlanishi hamda SamDUning Urgut filiali ochilishi, Samarqand viloyatiga oilaviy tadbirkorlik uchun 900 milliard so‘m kredit ajratilishi ma’lum qilindi. Prezident, shuningdek, yig‘ilishda Samarqanddagi Paxtachi tumanining nomini o‘zgartirishni taklif qildi.

Prezident safarni Samarqanddagi shifoxonada davolanayotgan O‘zbekiston Qahramoni Hasan Normurodovni borib ko‘rish bilan yakunladi.