Saudiya Arabistoni O‘zbekistonga sovg‘a qilgan 50 tonna xurmo muhtojlarga tarqatilayotgani ma’lum qilindi

Saudiya Arabistoni Ramazon oyi munosabati bilan O‘zbekistonga 50 tonna xurmo sovg‘a qilgani haqida xabar berilgan edi. “Vaqf” xayriya jamoat fondi matbuot xizmati ushbu xurmolar respublika bo‘ylab muhtojlarga beg‘araz xayriya qilinayotganini ma’lum qildi.

Mazkur xurmolar “Vaqf” xayriya jamoat fondi tomonidan Ramazon oyi arafasida respublikadagi tashkilotlar, masjidlar, madrasalarga xayriya sifatida tarqatilishi rejalashtirilgan edi. “Vaqf” fondi rasmiysining “Kun.uz”ga ma’lum qilishicha, yakunda mevalarni aholining zaif qatlamlariga taqdim etishga qaror qilingan.

Jumladan, xurmolar yetim, nogironligi bor, boquvchisini yo‘qotgan kabi insonlar yashovchi oilalarga ulashilmoqda.

Avvalroq “Vaqf” fondi koronavirusdan vafot etgan masjid imom-noibining oilasiga Nukusdan uch xonali uy olib bergani xabar qilingandi.