Markaziy saylov komissiyasining 14-aprel kuni o‘tkazilgan majlisida O‘zbekiston Prezidenti sayloviga tayyorgarlik ko‘rish bo‘yicha asosiy tadbirlar dasturi tasdiqlandi. Bu haqda MSK matbuot xizmati ma’lum qildi.
“Dasturdan hamkor tashkilotlar bilan birgalikda ilk bor Saylov kodeksi asosida o‘tajak Prezident sayloviga tayyorgarlik ko‘rish borasida qadam-baqadam amalga oshiriladigan ishlar o‘zining batafsil ifodasini topgan. Bajariladigan vazifalarning ijro muddati va mas’ul ijrochilari aniq ko‘rsatilgan”, — deyiladi MSK xabarida.
Asosiy tadbirlar dasturida saylov jarayoniga zamonaviy axborot-kommunikatsiya texnologiyalarini joriy qilish, ushbu jarayonda axborot-tushuntirish ishlarini tashkil etish, saylovga tayyorgarlik jarayonini koronavirus pandemiyasi sharoitini hisobga olgan holda o‘tkazish bo‘yicha aniq vazifalar ham belgilangan.
Dasturga muvofiq, saylovga tayyorgarlik ko‘rish jarayonini huquqiy va uslubiy jihatdan ta’minlash maqsadida barcha okrug va uchastka saylov komissiyalarining a’zolari uchun seminarlar, treninglar, o‘quv mashg‘ulotlari, konferensiyalar, davra suhbatlari boshqa tadbirlar, jumladan on-layn muloqotlar, o‘tkaziladi.
MSK majlisida, shuningdek, prezidentlik saylovini o‘tkazuvchi okrug va uchastka saylov komissiyalarining faoliyati tartibini belgilab beruvchi hamda O‘zbekiston Prezidentligiga nomzodlarning saylovoldi tashviqotini olib borish tartibiga doir nizomlar qabul qilingan.
Eslatib o‘tamiz, O‘zbekistonda Prezident saylovlari dekabr oyidan oktabrga ko‘chirilgan. Saylov muddatlari ko‘chirilishi yuzasidan Oliy Majlis Qonunchilik palatasi izoh bergandi.
Shavkat Mirziyoyev 2020-yil 29-dekabr kuni Oliy Majlisga yo‘llagan Murojaatnomasida 2021-yilda o‘tkaziladigan “davlat va xalq hayotidagi muhim siyosiy hodisa” — prezidentlik saylovlari masalasiga to‘xtalib o‘tgandi. O‘shanda Prezident Markaziy saylov komissiyasi “bo‘lajak saylovlarning milliy qonunchilik va umume’tirof etilgan xalqaro demokratik tamoyillar asosida yuksak saviyada tashkil etilishiga alohida e’tibor qaratishi” lozimligini ta’kidlagan.
“Gazeta.uz”ning qayd etishicha, Markaziy saylov komissiyasi 2021-yilda davlat budjetidan “joriy xarajatlar uchun” 2020-yilga nisbatan 74 baravar ko‘p — 4,1 milliardga nisbatan 304,2 milliard so‘m mablag‘ ajratdi.
Izoh (0)