AQSh hukumati rossiyalik diplomatlarni mamlakatdan chiqarib yuborish hamda xakerlik va saylovlarga aralashuvda ayblanayotgan Moskvaga qarshi yangi sanksiyalar kiritish haqida o‘ylamoqda. Bu haqda Bloomberg agentligiga asoslanib, “RBK” xabar berdi.

Foto: “RIA-Novosti”

Agentlik xabariga ko‘ra, Oq uy Moskvadagi taxmin qilingan dushmanlik harakatlari hamda Amerikaning Solar Winds kompaniyasi tomonidan ishlab chiqilgan dasturiy ta’minot yordamida davlat idoralariga uyushtirilgan xakerlik hujumiga oid ma’lumotlarni o‘rganishni yakunladi.

Agentlik suhbatdoshlaridan birining so‘zlariga ko‘ra, AQShning javob choralari bir nechta elementlarni, jumladan, “diplomat niqobi ostida ishlaydigan razvedka xodimlarini” mamlakatdan chiqarib yuborish, Rossiya prezidenti Vladimir Putinga yaqin odamlarga, shuningdek, saylovlarga aralashish bilan bog‘liq hukumat amaldorlariga qarshi sanksiyalar qo‘llashni o‘z ichiga olishi mumkin.

Oq uy va Davlat departamenti bu xabarlarga izoh berishdan bosh tortdi.

Moskva, o‘z navbatida, AQShning har qanday dushmanlik harakatlariga javob qaytarishini ma’lum qildi.

“Biz do‘stona shaklda bo‘lmagan har qanday qadamlarga javob beramiz, bu o‘z-o‘zidan ravshan. Hozircha men AQShning birorta aniq qarorini ko‘rmadim, hali hech narsa e’lon qilinmadi”, — dedi Rossiya tashqi ishlar vaziri Sergey Lavrov Bloomberg nashrining xabarlariga javoban.

Lavrov AQSh Rossiyaning dushmanlik harakatlarini ko‘rib chiqishni yakunlagani haqidagi xabarlarni o‘qiganini qo‘shimcha qildi. “Ular tekshiruvni qandaydir tarzda juda tez yakunladi, odatda AQSh bizni shu qadar ko‘p gunohlarda ayblaydiki, ularni bir necha hafta, hatto bir necha oy ichida o‘rganib chiqish mushkul, lekin ular qaror qilishga ulguribdi. Eshitishimcha, AQSh bizni boshqacha yo‘llar bilan ham jazolamoqchi”, — dedi vazir. Lavrovning so‘zlariga ko‘ra, Vashingtonning Moskvaga yondashuvi “boshi berk ko‘chada, balki undan ham ahmoqona shaklda”. Vazir “bu sanksiyalar joriy etilishidan ko‘zlangan maqsadlar hech qanday natija bermaydi”, deb hisoblamoqda

Bloomberg xabariga ko‘ra, 7-aprel kuni Oq uyda yuqori lavozimli amaldorlarning yig‘ilishi bo‘lib o‘tishi va ehtimoliy choralarni muhokama qilish rejalashtirilgan edi. “Bayden va uning bosh yordamchilari Rossiyani qanday qattiq jazolash kerakligini aniqlab olishi kerak, shu bilan birga, ular Eron yadroviy bitimi hamda iqlim o‘zgarishiga qarshi kurash bo‘yicha Moskvaning yordamiga muhtoj bo‘ladi. Bundan tashqari, AQSh Rossiya bilan qurollarni boshqarish to‘g‘risidagi muzokaralarni qayta boshlashga intilmoqda”, — deya qayd etdi Bloomberg.