Россия ўзининг АҚШдаги дипломатик ваколатхонаси раҳбари Анатолий Антоновни Москвага маслаҳатлашувга таклиф қилганига жавобан Вашингтон ўз элчиси Жон Салливанни Россиядан чақириб олиш ниятида эмас. Бу ҳақда АҚШ давлат департаментига таяниб, «РБК» хабар берди.
Аввалроқ Вашингтон томонидан бундай қарор қабул қилингани ҳақида CNN президент маъмуриятидаги иккита манбага асосланиб хабар берган эди.
«Россиянинг Антоновни Москвадаги маслаҳатлашувларга таклиф қилиш тўғрисидаги қарорига жавобан элчи Салливанни чақириб олиш ниятимиз йўқ. У ва АҚШнинг бошқа фидойи дипломатлари Россияда олиб бораётган фаолиятнинг ҳар бир куни Америка манфаатлари ва бизнинг икки томонлама муносабатларимизни таъминлаш учун жуда муҳимдир», — деди давлат департаменти Россия ахборот агентлигига.
CNN АҚШ Россиядаги элчисини алмаштирмаслик қарори билан ўзаро муносабатларда барқарорликни мустаҳкамлашга тайёрлигини намойиш этаётганини ёзди. Россиядаги вазиятдан яхши хабардор бўлган элчининг мамлакатда қолдирилиши, шунингдек, президент Владимир Путиннинг иқлим ўзгаришига бағишланган конференцияга таклиф қилиниши, АҚШ маъмурияти иложи борича Россия билан ҳамкорлик қилишга очиқ эканидан далолат беради, деб таъкидлади телеканал.
Салливан 2020 йил февралидан бери АҚШнинг Россиядаги дипломатик ваколатхонаси раҳбари бўлиб ишлаб келмоқда. CNN хабар беришича, президент Жо Байден ҳанузгача элчиларни тайинлаш устида ишламоқда ва кўплаб ўринларни тўлдиришда бир қарорга келмаган.
Россия элчиси Анатолий Антонов 17 март куни Москвага маслаҳат учун таклиф қилинган эди. Элчи Байден ABC News телеканалига берган интервьюсида журналистнинг Путинни қотил деб биласизми, деган саволига ижобий жавоб берганидан кейин чақириб олинди.
Россия Ташқи ишлар вазирлиги элчининг чақирилишига изоҳ бериб, мамлакатлар «қийин аҳволда бўлган рус-америка алоқаларини тузатиш йўлларини» белгилаши кераклигини айтди. Вазирлик вакили Мария Захарова Москва Россия–Америка муносабатларининг «қайтарилмас таназзулга учрашидан» манфаатдор эмаслигини таъкидлаб, бу масала Антонов билан маслаҳатлашув мавзуси бўлишини айтди. Дипломат 20 март куни АҚШдан жўнаб кетди.
Москвага келганидан сўнг элчи ҳам Россия Москва ва Вашингтон ўртасидаги муносабатларни «бутунлай тубсизликка тушиб қолишидан» манфаатдор эмаслигини маълум қилган.
Россия Ташқи ишлар вазирлигининг маълум қилишича, яқин келажакда Антонов Вашингтонга қайтмаслиги мумкин. «Бу эрта-индин ҳал бўладиган масала эмас. Элчининг қайтиш вақти Вашингтон икки томонлама йўлда қандай қадамлар ташлашига қараб белгиланади», — деди вазир ўринбосари Сергей Рябков.
Унинг сўзларига кўра, Антонов ўзи чақириб олинишига сабаб бўлган Москвадаги маслаҳатларини ҳали тугатмаган. «Кеча у шу ҳафтага режалаштирилган қўшимча учрашувлардан баъзиларини ўтказди», — деди Рябков журналистларга.
Аввалроқ Bloomberg АҚШ россиялик дипломатларни мамлакатдан чиқариб юбориши ва Москвага қарши янги санкциялар киритиши мумкинлиги ҳақида ёзганди. Москва, ўз навбатида, АҚШнинг ҳар қандай душманлик ҳаракатларига жавоб қайтаришини маълум қилган.
Изоҳ (0)