Jons Hopkins universiteti ma’lumotlariga ko‘ra, ayni paytda dunyo bo‘yicha koronavirusga chalinganlar soni 136 727 030 kishiga yetgan. Shularning 2 947 846 nafari vafot etgan. Kasallanganlar soni bo‘yicha yuqori beshlikdan AQSh (31,2 million), Hindiston (13,6 million), Braziliya (13,5 million), Fransiya (5,1 million) va Rossiya (4,6 million) o‘rin olgan.
Yevropa hududida pandemiya boshidan buyon COVID-19 oqibatidagi o‘limlar soni 1 milliontadan oshdi. 12-aprel holatiga Yevropaning 52 mamlakatida koronavirusdan vafot etganlar 1 000 288 kishini tashkil qilgan.
Jahon sog‘liqni saqlash tashkiloti epidemiologi Mariya van Kerxovening aytishicha, “ayni paytda biz pandemiyaning og‘ir nuqtasida turibmiz”.
Koronavirusning o‘tgan yil oxirida Britaniyada aniqlangan shtammi COVID-19’ning og‘irroq kechishiga olib kelmaydi. The Lancet Infectious Diseases va The Lancet Public Health tibbiy jurnallarida chop etilgan ikkita tadqiqot mualliflari shunday xulosaga keldi.
“Biz kasallikning kechish og‘irligi va virusning kelib chiqishi o‘rtasidagi bog‘liqlikni tasdiqlovchi dalillarni aniqlamadik”, — deyiladi The Lancet Infectious Diseases jurnalidagi maqolada. Ikkinchi tadqiqot mualliflari ham “B.1.1.7 shtammida simptomlardagi yoki kasallikning davomiyligidagi o‘zgarishlar” aniqlanmaganini qayd etdi.
Bundan tashqari, olimlar “britancha” shtamm bilan kasallanib o‘tgan bemorlarda qayta kasallanish holatlari koronavirusning boshqa variantlariga nisbatan ko‘proq yoki kamroq uchrashi borasida aniq bir dalillarni aniqlamadi. Shu sababli mavjud vaksinalar “britancha” shtammga qarshi samarali bo‘lishi kerak, deb hisoblaydi ular. Ayni vaqtda tadqiqotlar virusning ushbu variant yuqori darajada yuqumli ekanini tasdiqladi.
AQSh Mudofaa vazirligi — Pentagon olimlari COVID-19’ni simptomlar paydo bo‘lguniga qadar aniqlay oladigan mikrochipni yaratdi. U qon tarkibini nazorat qilish imkonini beradi va organizmga koronavirus kelib tushishi bilan tezlikda signal beradi.
Armiya infeksionist shifokori, iste’fodagi polkovnik Mett Xepbyorn aniqlik kiritishicha, qurilma matosifat geldan iborat bo‘lib, tanaga o‘rnatilgach, doimiy ravishda qonni tekshirib turadi.
“Siz uni teri ostiga kiritasiz va u tana ichida yuz berayotgan kimyoviy reaksiyalarni kuzatib boradi, sizga signal bersa, demak, ertaga sizda simptomlar paydo bo‘lishi mumkin”, — dedi u.
Xepbyornning so‘zlariga ko‘ra, virus qonga kelib tushganidan keyin uch-besh daqiqa ichida signal beriladi. Natijada tashxis vaqti qisqaradi, bu esa davolanish samaradorligini oshiradi.
Shuningdek, Pentagon vakili chip yordamida muassasa odamlarning joylashgan joyi haqidagi axborotni yoki boshqa ma’lumotlarni qo‘lga kiritmoqchi emasligini ta’kidladi. Qurilma ayni paytda ishlab chiqish jarayonining so‘nggi bosqichida.
Janubiy Afrika, Buyuk Britaniya, Efiopiya, Braziliya va Angola universitetlari olimlari Angola aeroportidagi sayohatchilarda koronavirusning 34 ta mutatsiyadan iborat yangi shtammini aniqladi.
“Biz bu yangi shtammni yuqtirib olish bilan bog‘liq atigi uchta holatni aniqlagan bo‘lsak-da, bu zudlik bilan tadqiqot olib borishni talab etadi, chunki ushbu shtamm aniqlangan mamlakatda epidemiya ahamiyatli darajada qayd etilmagan va virusning mamlakat ichida va tashqarisida tarqalishining oldini olish uchun jamoatchilik sog‘lig‘ini saqlash choralari yetarlicha ko‘rilmaydi”, — deya ogohlantirdi olimlar.
Izoh (0)