AQSh tashkilotlari Baydenni Putin bilan konstruktiv muzokaralar olib borishga chaqirdi
AQShda 27 ta tashkilot Jo Baydenni Rossiya prezidenti Vladimir Putin bilan konstruktiv ikki tomonlama muzokaralar olib borishga chaqirdi. Bu haqda The Hill nashriga asoslanib “RBK” xabar berdi.
“Diplomatiya, qurol nazorati, qurolsizlanish va tinchlikni targ‘ib qiluvchi milliy tashkilotlar sifatida biz dunyodagi yadro kallaklarining 90 foizdan ortig‘iga egalik qilayotgan ushbu ikki mamlakat rahbarlari o‘rtasidagi salbiy almashinuvlardan chuqur xavotirdamiz”, — deyiladi tashkilotlar bayonotida.
Nashr bayonotni imzolaganlarning to‘liq ro‘yxatini taqdim etmadi, ammo ularning tarkibida Justice Democrats, Blue America, Demand Progress, Our Revolution va Progressive Democrats of America kabi “so‘l”larga xayrixoh tashkilotlar borligini ta’kidladi.
Tashkilotlar Amerika prezidenti “mulohazasiz bayonotlar berishni” bas qilishi, buning o‘rniga Rossiya hukumati bilan yadro quroli bo‘yicha muzokaralarni davom ettirishi kerak deb hisoblaydi.
Murojaat mualliflari Bayden diplomatiyani mamlakatning “tashqi siyosat markaziga” aylantirishga va’da berganini eslatib o‘tdi. Shuningdek, ular AQSh va Rossiya o‘rtasida yadroviy qurollanish poygasi xavfi hozir “har qachongidan ham ravshanroq” ekanini ta’kidlagan.
“Demokratik partiyaning progressiv bazasi a’zolari Putinga yoki Rossiyaga qarshi urush olib borayotgan tashqi siyosatdan manfaatdor emas”, — dedi Progressive Democrats of America partiyasining ijrochi direktori Alan Minski.
“Odamlarning istagi xalqaro hamkorlik bilan barchamizga o‘tgan yilgi iqtisodiy va sog‘liqni saqlash sohasidagi ofatlardan tezroq qutilishga imkon beradigan xavfsiz dunyoda yashashdir. Biz Sovuq urushning qaqshatqich zarbalariga dosh berolmaymiz, yadro urushi yoqasida muvozanat saqlash haqida gapirmasa ham bo‘ladi”, — deya qo‘shimcha qildi u.
Eslatib o‘tamiz, AQSh prezidenti Jo Bayden ABC telekanaliga bergan intervyusida jurnalistning “Rossiya prezidenti Vladimir Putinni qotil deb hisoblaysizmi?” — degan savoliga tasdiq javobini bergan.
Kreml esa Jo Baydenning Vladimir Putin haqidagi bayonotlarini “juda yomon” deb hisoblashini aytgan. Bu haqda Rossiya prezidentining matbuot kotibi Dmitriy Peskov jurnalistlarga bergan intervyusida aytib o‘tgan.
O‘z navbatida, Putin AQSh davlat rahbari Jo Baydenga to‘g‘ridan to‘g‘ri efir orqali muloqot qilishni taklif etgan. AQSh prezidenti Jo Bayden Rossiya prezidenti Vladimir Putin uni taklif qilgan ochiq muhokamaga rozilik berish-bermasligi haqidagi savolni e’tiborsiz qoldirgan.
