Rossiya Ukraina chegarasiga va Qrimga 40 ming nafardan askar jo‘natgani ma’lum qilindi. Zelenskiy Rossiyani “jilovlash”da Baydendan yordam so‘radi

Rossiya Ukrainaning sharqiy chegarasiga 40 ming askarli qo‘shin tortdi. Bu haqda Ukraina prezidenti Vladimir Zelenskiyning matbuot kotibi Yuliya Mendel ma’lum qildi, deb yozadi Meduza.

Kiyev ma’lumotlariga ko‘ra, yana 40 ming askar Qrimga joylashtirilgan. Shuningdek, Zelenskiy AQSh prezidenti Jo Baydendan Rossiyani “jilovlashda” yordam so‘radi.

“AQSh Ukrainaning yaxshi do‘sti, ammo AQSh prezidenti Rossiyani jilovlash va Ukraina sharqidagi mojaroni to‘xtatish uchun ko‘proq harakat qilishi kerak”, — dedi Vladimir Zelenskiy CNN telekanaliga bergan intervyusida.

“Kiyevga ko‘proq qurol-yarog‘ va pul kerak, ayniqsa, mamlakatning NATO’ga kirishi uchun ko‘proq yordam kerak. Agar AQSh Ukrainani NATO tarkibida ko‘rmoqchi bo‘lsa, ular buni to‘g‘ridan to‘g‘ri aytishi va amalda ko‘rsatishi kerak. So‘z bilan emas ”, — dedi prezident. Shuningdek, Zelenskiy bilan suhbatlashgan muxbir Ukrainaning NATO’ga qo‘shilishi borasida AQShning hal qiluvchi harakatlari ehtimoli kamligi, chunki bu Moskvani qo‘zg‘atishi va chegaradagi ziddiyatlarni kuchaytirishi mumkinligini aytdi. “Siz haq bo‘lishingiz mumkin”, — deb javob berdi Zelenskiy muxbirga.

“Ammo hozir nima bo‘lyapti? Biz chegaralarda nima qilyapmiz? Odamlarimiz bu yerda nima qilyapti? Ular kurashmoqda”, — deya qo‘shimcha qildi Ukraina prezidenti.

Rossiya prezidentining matbuot kotibi Dmitriy Peskov, Ukraina rahbarining Putin bilan muzokaralar o‘tkazish to‘g‘risidagi iltimoslarini ko‘rmaganini va oxirgi kunlarda bunday so‘rovlar kelgan-kelmaganini bilmasligini aytdi.

Peskov, shuningdek, Rossiya qo‘shinlari o‘z mamlakati hududi bo‘ylab harakatlanayotganini va shuning uchun ular o‘zlari ma’qul ko‘rgan yo‘nalishlar bo‘ylab harakatlanishi mumkinligini bir necha bor ta’kidladi. Prezident vakili, shuningdek, qo‘shinlarni qayta joylashtirish boshqa davlatlar uchun xavf tug‘dirmasligini aytdi.

Birlashgan Millatlar Tashkiloti (BMT) Donbassdagi barcha tomonlarning ziddiyat keltirib chiqarishdan tiyilishga va mojaroning avj olishiga olib kelishi mumkin bo‘lgan harakatlarni to‘xtatishga chaqirmoqda.

“Mojaroda ishtirok etayotgan va unga aloqador bo‘lgan barcha tomonlardan shuni so‘raymizki, maksimal darajada vazmin bo‘ling, mojaroning avj olishiga hissa qo‘shishi mumkin bo‘lgan har qanday harakatlar va ritorikalardan saqlaning.  Barcha masalalar o‘zaro muloqot orqali hal qilinishi kerak ”, — dedi BMT bosh kotibining vakili Stefan Dyujarrik.

Shuningdek, u mojaro zonasida insonparvarlik muammolari ko‘payib borayotganidan BMTning tashvishda ekanini alohida ta’kidladi. Dyujarrikning ta’kidlashicha, tashkilot Ukraina sharqida o‘t ochishni to‘xtatish rejimining buzilishi, qo‘shinlarning harakatlari ko‘paygani haqidagi xabarlarni xavotir bilan kuzatmoqda.

O‘z navbatida G7 mamlakatlari (Kanada, Fransiya, Germaniya, Italiya, Yaponiya, Buyuk Britaniya va AQSh) tashqi ishlar vazirlari, shuningdek, Yevropa Ittifoqi vakili Rossiya qo‘shinlarining Ukraina chegaralariga va Qrimga joylashtirlishidan xavotir bildirib, Rossiyani ushbu “provokatsiyalarni to‘xtatishga” chaqirdi.

“Ushbu katta hajmdagi ogohlantirilmagan qo‘shin tahdid soluvchi va beqarorlashtiruvchi harakatlarni keltirib chiqarmoqda. Biz Rossiyani xalqaro majburiyatlarga muvofiq provokatsiyalarni to‘xtatishga va keskinlikni darhol yumshatishga chaqiramiz”, —  deyiladi G7 bayonotida.

Vazirlar, shuningdek, Rossiyaga Yevropa Xavfsizlik va hamkorlik tashkiloti faoliyati prinsiplarini eslatdi va uni harbiy kuchlar harakatining shaffofligi bo‘yicha o‘z majburiyatlarini bajarishga chaqirdi. Ular Ukraina sharqidagi mojaroni siyosiy yo‘l bilan hal qilishning yagona yo‘li Minsk kelishuvlarining amalga oshirilishi ekanini aytdi.