Hindistonning Dori-darmonni nazorat qilish markaziy tashkiloti mutaxassislari 12-aprel kuni Rossiyaning “Sputnik V” vaksinasini favqulodda foydalanish uchun ma’qulladi. Bu haqda The Economic Times xabar berdi.
Endi bu qarorni milliy tartibga soluvchi — Dori-darmon vositalarining nazorati bosh boshqarmasi ma’qullashi kerak. Rossiya vaksinasi Hindistonda ma’qullangan koronavirusga qarshi uchinchi preparat bo‘ladi. Bungacha Hindistonda AstraZeneca va mahalliy Bharat Biotech kompaniyasining Covaxin vaksinalari ma’qullangan edi.
Fevral oyida Hindistonning Dr. Reddy’s Laboratories kompaniyasi “Sputnik V” vaksinasidan foydalanish uchun ariza topshirgan edi.
Hindiston Sog‘liqni saqlash vazirligining ma’lumot berishicha, 11-aprel holatiga ko‘ra, mamlakatda koronavirus bilan kasallanish bo‘yicha 168,9 mingta yangi holat aniqlandi va pandemiya boshidan buyon koronavirusga chalinganlar 13,5 milliondan oshdi.
Rossiyaning to‘g‘ridan to‘g‘ri investitsiyalar jamg‘armasi (RFPI) 5-aprel kuni Hindistonning Panacea Biotec kompaniyasi bilan 100 million dozada “Sputnik V” vaksinasini ishlab chiqarish bo‘yicha shartnoma imzolaganini ma’lum qildi. Jamg‘armaning xabariga ko‘ra, vaksina bugungi kunda umumiy aholisi 1,5 milliard bo‘lgan dunyoning 59 ta mamlakatida ro‘yxatdan o‘tkazilgan.
Pfizer kompaniyasi vaksina ishlab chiqaruvchilar orasida birinchi bo‘lib Hindistonda ro‘yxatdan o‘tish uchun ariza topshirdi. Lekin 2021-yilning fevral oyida kompaniya arizasini qaytib oldi. Hindistonning tartibga soluvchi tashkiloti mutaxassislari bilan uchrashuvdan so‘ng kompaniya shunday qarorga keldi. Mutaxassislar Hindistonda vaksinaning samaradorligi va xavfsizligini isbotlovchi oraliq sinovlarining natijalari olinmaguncha preparatdan foydalanish bo‘yicha shartnoma tuzmasligini bildirdi.
Hindistonda chet el vaksinalari bo‘yicha tadqiqot olib boruvchi boshqa kompaniyalardan farqli o‘laroq, Pfizer boshqa mamlakatlarda, shu jumladan, AQSh va Germaniyada olingan ruxsatnomalarni ilova qilgan holda rasmiylardan istisno qilishini so‘radi.
Hindistonda 16-yanvardan ommaviy vaksinatsiya boshlandi. Birinchi bosqichda 30 million kishi emlandi: 10 million tibbiyot xodimlari va 20 million xavfli hududlarda ishlaydiganlar (politsiyachilar, harbiy xizmatchilar, fuqarolar mudofaasi tizimi xodimlari va boshqalar).
1-martdan boshlangan ikkinchi bosqichda esa 60 yoshdan oshganlar, shuningdek, surunkali kasalliklari bor 45 yoshdan oshgan aholi emlandi. Uchinchi bosqich esa 1-apreldan boshlandi va bunda mamlakatning barcha 45 yoshdan oshgan aholisi qamrab olindi.
Izoh (0)