AQShning sobiq prezidenti Donald Tramp respublikachilar partiyasi homiylari bilan o‘tgan kechki ovqat paytida koronavirusga qarshi vaksinani Trumpcine (“Trampsina”) deb atashni taklif qildi, deb yozadi Business Insider.
Xabarga ko‘ra, sobiq davlat rahbari pandemiyaga qarshi kurashda o‘zining xizmatlarini qayd etib o‘tgan va koronavirusni davolash uchun bir nechta dorilarning yaratilishida o‘z hissasi borligini ta’kidlagan. Trampning aytishicha, aynan u COVID-19’ga qarshi vaksinani ishlab chiqarishni tezlashtirish operatsiyasini boshlab bergan.
“Umid qilamanki, har kim COVID-19 (ko‘pincha Xitoy virusi nomi bilan ataluvchi) vaksinasini qabul qilayotganida shuni esga oladiki, agar men prezident bo‘lmaganimda, ehtimol, besh yil ichida ham siz zarur vaksinani olmagan bo‘lar edingiz”, — dedi Tramp. U argument sifatida COVID-19’ga qarshi vositalarni ishlab chiqarishni tezlashtirish uchun “Warp Speed” operatsiyasini boshlaganiga ishora qildi.
Biroq, nashrning ta’kidlashicha, sobiq davlat rahbarining birorta sa’y-harakatlari COVID-19’ga qarshi vaksina ishlab chiqarishga ketadigan vaqtni qisqartirishda yordam bergani to‘g‘risida dalillar yo‘q.
“Trampning iddao qilishicha, hamma koronavirusga qarshi preparatni vaksina deyish o‘rniga Trumpcine deb atashi kerak”, — deb yozgan CNN muxbiri Kevin Liptak Twitter’da.
Bundan tashqari, u o‘z shtatlaridagi vaksinatsiya ishlarini qo‘llab-quvvatlagan respublikachi gubernatorlarni alqadi va sobiq bosh tibbiy maslahatchi doktor Entoni Fauchni “maqtanchoq” deb atadi.
Avvalroq Donald Tramp o‘z tarafdorlari bilan muloqot qilish maqsadida o‘zining “45office.com” shaxsiy saytini ishga tushirgan edi. “Donald Trampning ofisi Tramp ma’muriyatining buyuk qadriyatini saqlab qolishga intilmoqda, shu bilan birga, America First (Amerika birinchi navbatda) dasturini ilgari surmoqda”, — deyilgan sayt tavsifida.
Izoh (0)