Ҳиндистонда «Спутник V» вакцинасидан фавқулодда ҳолатларда фойдаланишга рухсат берилди

Ҳиндистоннинг Дори-дармонни назорат қилиш марказий ташкилоти мутахассислари 12 апрель куни Россиянинг «Спутник V» вакцинасини фавқулодда фойдаланиш учун маъқуллади. Бу ҳақда The Economic Times хабар берди.

Энди бу қарорни миллий тартибга солувчи — Дори-дармон воситаларининг назорати бош бошқармаси маъқуллаши керак. Россия вакцинаси Ҳиндистонда маъқулланган коронавирусга қарши учинчи препарат бўлади. Бунгача Ҳиндистонда AstraZeneca ва маҳаллий Bharat Biotech компаниясининг Covaxin вакциналари маъқулланган эди.

Февраль ойида Ҳиндистоннинг Dr. Reddy’s Laboratories компанияси «Спутник V» вакцинасидан фойдаланиш учун ариза топширган эди.

Ҳиндистон Соғлиқни сақлаш вазирлигининг маълумот беришича, 11 апрель ҳолатига кўра, мамлакатда коронавирус билан касалланиш бўйича 168,9 мингта янги ҳолат аниқланди ва пандемия бошидан буён коронавирусга чалинганлар 13,5 миллиондан ошди.

Россиянинг тўғридан-тўғри инвестициялар жамғармаси (RFPI) 5 апрель куни Ҳиндистоннинг Panacea Biotec компанияси билан 100 миллион дозада «Спутник V» вакцинасини ишлаб чиқариш бўйича шартнома имзолаганини маълум қилди. Жамғарманинг хабарига кўра, вакцина бугунги кунда умумий аҳолиси 1,5 миллиард бўлган дунёнинг 59 та мамлакатида рўйхатдан ўтказилган.

Pfizer компанияси вакцина ишлаб чиқарувчилар орасида биринчи бўлиб Ҳиндистонда рўйхатдан ўтиш учун ариза топширди. Лекин 2021 йилнинг февраль ойида компания аризасини қайтиб олди. Ҳиндистоннинг тартибга солувчи ташкилоти мутахассислари билан учрашувдан сўнг компания шундай қарорга келди. Мутахассислар Ҳиндистонда вакцинанинг самарадорлиги ва хавфсизлигини исботловчи оралиқ синовларининг натижалари олинмагунча препаратдан фойдаланиш бўйича шартнома тузмаслигини билдирди.

Ҳиндистонда чет эл вакциналари бўйича тадқиқот олиб борувчи бошқа компаниялардан фарқли ўлароқ, Pfizer бошқа мамлакатларда, шу жумладан, АҚШ ва Германияда олинган рухсатномаларни илова қилган ҳолда расмийлардан истисно қилишини сўради.

Ҳиндистонда 16 январдан оммавий вакцинация бошланди. Биринчи босқичда 30 миллион киши эмланди: 10 миллион тиббиёт ходимлари ва 20 миллион хавфли ҳудудларда ишлайдиганлар (полициячилар, ҳарбий хизматчилар, фуқаролар мудофааси тизими ходимлари ва бошқалар).

1 мартдан бошланган иккинчи босқичда эса 60 ёшдан ошганлар, шунингдек, сурункали касалликлари бор 45 ёшдан ошган аҳоли эмланди. Учинчи босқич эса 1 апрелдан бошланди ва бунда мамлакатнинг барча 45 ёшдан ошган аҳолиси қамраб олинди.