Hindistonning Nagpur shahridagi koronavirusga chalingan bemorlar davolanayotgan shifoxonada kelib chiqqan yong‘in oqibatida to‘rt kishi qurbon bo‘ldi. Bu haqda Hindustan Times gazetasiga tayanib, “Korrespondent.net” xabar berdi.
Nashr ma’lumotlariga ko‘ra, yong‘in 9-aprel kuni tunda, tibbiyot muassasasining birinchi qavatida boshlangan va tez orada qayta jonlantirish bo‘limi joylashgan ikkinchi qavatga o‘tgan. Yong‘in sodir bo‘lgan paytda jonlantirish bo‘limida 10 nafar bemor bo‘lgan.
Shifoxona xodimlari og‘ir ahvoldagi olti nafar bemorni qutqarib qoldi, lekin qolgan to‘rt nafari kislorod yetishmasligidan vafot etdi.
Umumiy hisobda yong‘in bo‘lgan binodan 27 kishi evakuatsiya qilindi va og‘ir ahvolda shaharning boshqa shifoxonasiga yetkazildi.
Gazetaning xabar berishicha, yong‘in sabablari hozircha noma’lum, lekin hodisaga qisqa tutashuv sabab bo‘lgan bo‘lishi mumkin, deb gumon qilmoqda qutqaruvchilar.
Avvalroq Mumbaydagi Dreams Mall savdo markazida joylashgan koronavirus bemorlari davolanayotgan Sunrise Hospital shifoxonasida sodir bo‘lgan yong‘in oqibatida ham 10 kishi halok bo‘lgan edi. Shifoxonadan 76 kishi evakuatsiya qilingan, ularning 7 nafari sun’iy nafas oldirish apparatiga ulangan.
Shuningdek, Bangladeshning janubidagi Koks-Bazar shahrida joylashgan Baluxali roxinja qochqinlari lagerida katta yong‘in chiqib, bir necha kishi halok bo‘ldi. Ta’kidlanishicha, kelib chiqishi noma’lum bo‘lgan yong‘in minglab uylarni yo‘q qilgan.
Izoh (0)