Ukrainada asosida kannabis o‘simligi bo‘lgan ba’zi dori vositalari, psixotrop moddalari va kimyoviy birikmalari narkotik moddalar ro‘yxatidan chiqarildi. Bu haqda mamlakat vazirlar mahkamasining farmoniga asoslanib, Tengrinews xabar berdi.
Xususan, tetragidrokannabinol (TGK) xossasidek ta’sirga ega “Nabilon” sintetik kannabinoidi, shuningdek, tarkibi TGK va kannabidiol bilan bir xil bo‘lgan “Nabiksimols” kannabis ekstraktiga nisbatan taqiq bekor qilindi.
Hujjatga ko‘ra, Ukrainada endi “Nabilon”, “Nabiksimols” va “Dronabinol” (TGK) psixotrop moddalaridan faqat dori vositalari yoki dori vositalarilarini ishlab chiqarish uchun mo‘ljallangan moddalar shaklida foydalanish mumkin.
Shuningdek, izolyatsiya qilingan kannabidiol moddasi ham davlat nazoratidan olinadi.
TCH nashrining aniqlik kiritishicha, “Nabilon” saraton kimyoterapiyasining nojo‘ya ta’sirlarini davolash uchun (ko‘ngil aynishi va qayt qilish), “Nabiksimols” (“Sativeks”) esa sklerozda mushaklardagi spazmlarni yo‘qotish uchun qabul qilinadi.
Avvalroq AQSh Kongressining vakillar palatasi marixuanani federal darajada qonuniylashtirish uchun ovoz bergani, Meksika Kongressining quyi palatasi esa rekreatsion, tibbiy va ilmiy maqsadlarda kannabis o‘simligidan foydalanganlik uchun jinoiy javobgarlikni bekor qiluvchi qonun loyihasini qabul qilgani haqida xabar berildi.
Shuningdek, BMTning Giyohvandlik vositalari bo‘yicha komissiyasi tibbiyot marixuanasi hamda uning hosilasini dunyodagi eng xavfli giyohvand moddalar toifasidan chiqarib tashlash bo‘yicha qaror qabul qildi.
Izoh (0)