Shveysariyada 50 dan ziyod odam koronavirusga qarshi emlanganidan keyin vafot etdi. Bu haqda Swissmedic davlat farmatsevtik regulyatori xabar bergan.
Shveysariya farmatsevtika sohasida vakolatli tashkilot bo‘lgan Swissmedic vaksinatsiyadan keyingi nojo‘ya ta’sirlar yuzasidan 1174 ta xabarnomani o‘rganib chiqqan va 577 ta holat Pfizer/BioNTech vaksinasidan keyin, 580 tasi esa Moderna bilan emlanishdan keyin kuzatilganini bildirgan, 17 ta holatda odamlarning aynan qaysi vaksina bilan emlangani bo‘yicha axborot berilmagan.
“55 ta holatda odamlar vaksinatsiyadan keyin ma’lum vaqt o‘tach vafot etgan. O‘lganlarning o‘rtacha yoshi 84 ga teng va ularning deyarli hammasi jiddiy surunkali kasalliklar bilan og‘rigan”, — deyiladi Swissmedic axborotida.
Qayd etilishicha, har bir holat chuqur tahlil qilingan. Taxminlarga ko‘ra vaksinatsiya qilingan bemorlarning o‘limiga yurak qon-tomir kasalliklar yoki o‘pka va nafas yo‘llaridagi kasalliklar sabab bo‘lgan. Swissmedic bergan ma’lumotlarda vaksinatsiyaning odamlar o‘limiga olib kelgani yuzasidan aniq dalillar keltirilmagan.
Avval Avstriyada 40 nafar odamning koronavirusga qarshi emlash o‘tkazilganidan keyin vafot etgani xabar qilingandi. 2020-yil 12-dekabrdan 2021-yil 26-fevralgacha mamlakatda Pfizer/BioNTech preparati bilan emlangan 41 nafar kishi olamdan ko‘z yumgan. Vafot etganlarning 11 nafari COVID-19 koronavirus infeksiyasining inkubatsion davri davom etayotgan vaqtda emlangani tufayli o‘lim holatlari qayd etilgan. Yana 19 kishida jiddiy kasalliklar mavjud bo‘lgan va o‘lim holatlari ularning asoratlari oqibatida kuzatilgan. Shuningdek, AQShda Johnson & Johnson bilan emlanganlarda nojo‘ya ta’sirlar paydo bo‘lgach, ikkita vaksinatsiya markazi yopilgan.
Izoh (0)