Toshkentda “havo sharlari” sotuvchilari o‘rtasida joy talashish oqibatida yuzaga kelgan janjal oqibatida bir kishi pichoqlandi, deb xabar beradi Tergov departamenti.
Ma’lum qilinishicha, 5-aprel kuni soat 22:00 dan 23:30 lar oralig‘ida 22 yoshli Doston Shayxontohur tumani Samarqand darvoza ko‘chasida joylashgan avtomashinalar yuvish shoxobchasi yonida Alisher ismli yigit bilan kelib chiqqan o‘zaro janjal natijasida yonida bo‘lgan pichoq bilan jarohat yetkazgan. Oqibatda shu kuni soat 04:45 da Alisher olgan jarohatlari tufayli ko‘rsatilgan muolajalarga qaramay shifoxonada vafot etgan.
Mazkur holat yuzasidan Shayxontohur tumani bo‘yicha IIO FMB huzuridagi Tergov bo‘linmasi tomonidan Dostonga nisbatan Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish natijasida jabrlanuvchining o‘limiga sabab bo‘lsa) bilan jinoyat ishi qo‘zg‘atilgan.
Tergov harakatlari jarayonida, ushbu janjalning kelib chiqishiga Doston va Alisher hamda ularning yonida bo‘lgan sheriklari “Samarqand darvoza” savdo markazi yonida “havo sharlari” sotib turgan vaqtida joy talashishlari sabab bo‘lgani aniqlangan.
Hozirda ushbu janjalda ishtirok etgan barcha fuqarolarning shaxsi aniqlanib, ular bilan tegishli tergov harakatlari olib borilmoqda.
Avvalroq Andijonda qo‘shni ayolni qarz bermagani va ustidan kulgani uchun o‘ldirgan shaxs 17,5 yilga qamalgani, Qashqadaryoda mast erkak xotini va qaynsinglisini pichoqlagani hamda buxorolik ayol rashk sabab erini pichoqlab qo‘ygani haqida xabar berilgandi.
Izoh (0)