O‘zbekiston Transport vazirligi Rossiyaga amalga oshirilayotgan aviaqatnovlar bo‘yicha aholidan kelib tushayotgan ko‘plab murojaatlarga izoh berdi.
Ma’lum qilinishicha, Rossiyaga O‘zbekistondan boruvchi yo‘lovchilar oqimining haddan tashqari ko‘pligi, bugungi epidemiologik vaziyat tufayli transportning boshqa turlarida qatnovlarning amalga oshirilishiga ruxsat etilmagani, aviaqatnovlar sonining ham cheklangani talab va taklif o‘rtasidagi nomutanosiblikning keskin ortib ketishiga sabab bo‘lmoqda.
Pandemiyagacha bo‘lgan davrda O‘zbekistonning turli hududlaridan Rossiyaga Uzbekistan Airways avikompaniyasi haftasiga 87 ta reys bajargan bo‘lsa, Rossiya aviakompaniyalari mamlakatning turli shaharlariga haftasiga 97 reys amalga oshirgan. Faqatgina aviaqatnovlar orqali haftasiga 40 mingdan ortiq yo‘lovchilarga xizmat ko‘rsatilgan.
Bundan tashqari, Toshkent–Moskva, Andijon–Moskva, Toshkent–Qozon, Toshkent–Volgograd, Toshkent–Saratov, Toshkent–Novosibirsk, Toshkent–Ufa, Andijon–Ufa yo‘nalishlarida muntazam ravishda haftasiga 13 ta poyezd qatnovlari amalga oshirilgan. Shu bilan birga, Toshkent–Moskva, Toshkent–Sankt-Peterburg, Toshkent–Qozon, Toshkent–Nijniy Novgorod, Toshkent–Omsk, Toshkent–Novosibirsk yo‘nalishlarida haftasiga 12 marotabadan avtobus qatnovlari amalga oshirib kelingan.
“Aynan yuqorida keltirib o‘tilgan ko‘rsatkichlarning o‘zi haftasiga bor yo‘g‘i bir marotaba amalga oshirilayotgan muntazam aviqatnovlarga chiptalarning nima uchun ayni damda sotuvda qolmaganligiga izoh bo‘la olishi mumkin. Turli transport qatnovlaridan foydalangan yo‘lovchilarning barchasi hozirda o‘rnatilgan cheklov choralari sabab faqatgina aviqatnovlar orqaligina safarni amalga oshirishga majbur bo‘lmoqda.
Aviachipta narxlarini sun’iy ravishda oshirib sotish maqsadida Uzbekistan Airways kompaniyasi agentlari tomonidan chiptalarni oldindan sotib olinganligi to‘g‘risida ijtimoiy tarmoqlarda tarqatilayotgan da’volar esa mutlaqo asossizdir”, — deyiladi munosabatda.
Uzbekistan Airways aviakompaniyasi rahbariyati eng quyi pog‘onadagi xodimlardan tortib, yuqori lavozimlardagi rahbarlarning ham aviachipta sotuvlari bilan bog‘liq turli-tuman ko‘rinishdagi noxolis xatti-harakatlarni sodir etishlariga nisbatan toqatsiz munosabatda ekanini, chipta sotuvlari bilan bog‘liq barcha jarayonlar shaffof tarzda amalga oshirilishi ustidan nazorat o‘rnatilganini ma’lum qilgan.
Ta’kidlanishicha, Uzbekistan Airways aviakompaniyasi tomonidan ayni damda Toshkent–Moskva yo‘nalishida bajarilayotgan muntazam aviaqatovlar uchun ekonom klass chipta narxi bir tomonga 4,2 million so‘mgacha, biznes-klass chipta narxlari esa 10, 736 million so‘mgacha sotilmoqda.
“Shu o‘rinda yo‘lovchilardan tushunmovchiliklarning oldini olish uchun chiptalarni tezlashtirib xarid qilish xizmatlarini taklif qiluvchi shubhali shaxslarga murojaat etmasligini so‘rab qolamiz. Chiptada ko‘rsatilgan va o‘zingiz to‘lagan narxni taqqoslashingizni tavsiya etamiz”, — deyiladi vazirlik izohida.
O‘zbekiston Transport vazirligi fuqarolardan bu kabi yolg‘on xabarlarga ishonib, aldanib qolishlarining oldini olish maqsadida charter reyslarini amalga oshiruvchi avikompaniyalarning parvozni bajarishiga ruxsat etilgani to‘g‘risidagi ma’lumotlarni Fuqaro aviatsiyasi agentligi rasmiy veb-saytidan aniqlashtirib olishlarini tavsiya etadi.
Avvalroq Rossiya 1-apreldan O‘zbekiston bilan muntazam aviaqatnovlarni tiklashi to‘g‘risida xabar berilgandi. Rossiyaning O‘zbekistondagi elchixonasi konsullik bo‘limi birinchi bosqichda faqat bitta — haftasiga bir marta Moskva—Toshkent yo‘nalishi amalga oshirilishini ma’lum qilgandi. Ushbu xabardan so‘ng Rossiyaga uchuvchi samolyot chiptalariga talab 165 foizga o‘sgandi.
Izoh (0)