Qashqadaryo viloyatining Qarshi tumanida mast erkak xotini va qaynsinglisini pichoqladi. Natijada ayollardan biri vafot etdi. Bu haqda viloyat IIB axborot xizmati ma’lum qildi.

Foto: Qashqadaryo viloyat IIB

Xabar berilishicha, Qarshi shahrida yashovchi ayol N.S. eri K.S. bilan o‘zaro kelishmovchilik sabab tortishib qolib, 2020-yilning dekabr oyi oxirida Qarshi tumanida yashovchi singlisi N.L.ning uyida yashay boshlagan. 2021-yil 14-yanvar kuni soat taxminan 18:10 da qaynsinglisining uyiga mast holda borgan er jahl ustida turmush o‘rtog‘i va qaynsinglisining badaniga oshxona pichog‘i bilan og‘ir tan jarohati yetkazgan.

So‘ngra o‘zini ham o‘ldirish maqsadida qo‘lidagi oshxona pichog‘ini qorniga uch marotoba sanchgan. Voqea joyidan, 15—20 daqiqa o‘tirgach, velosipediga minib, yashash uyiga qaytgan.

Foto: Qashqadaryo viloyat IIB

Viloyat IIB axborot xizmatining aniqlik kiritishicha, pichoqlangan ayollardan biri vafot etgan. Ammo aynan kimligi ochiqlanmagan.

Viloyat IIB boshlig‘i, polkovnik Shuhrat Sotvoldiyev ishtirokida Qarshi shahar prokuraturasi, boshqarma Faxriylar kengashi, sektor rahbarlari, mutasaddi idoralar vakillari, mahalla faollari, imom xatib, profilaktika inspektorlari hamda janjalkash oila a’zolari mazkur qotillikning kelib chiqish sababi va oqibatlarini muhokama qilgan.

Foto: Qashqadaryo viloyat IIB

Holat yuzasidan Qarshi tuman prokuraturasi tomonidan K.S.ga nisbatan Jinoyat kodeksining 97-moddasi 2-qismi (qasddan odam o‘ldirish) bilan jinoyat ishi qo‘zg‘atilib, dastlabki tergov harakatlari olib borilmoqda.