Тошкентда «ҳаво шарлари» сотувчилари ўртасида жой талашиш оқибатида юзага келган жанжал оқибатида бир киши пичоқланди, деб хабар беради Тергов департаменти.
Маълум қилинишича, 5 апрель куни соат 22:00 дан 23:30 лар оралиғида 22 ёшли Достон Шайхонтоҳур тумани Самарқанд дарвоза кўчасида жойлашган автомашиналар ювиш шохобчаси ёнида Алишер исмли йигит билан келиб чиққан ўзаро жанжал натижасида ёнида бўлган пичоқ билан жароҳат етказган. Оқибатда шу куни соат 04:45 да Алишер олган жароҳатлари туфайли кўрсатилган муолажаларга қарамай шифохонада вафот этган.
Мазкур ҳолат юзасидан Шайхонтоҳур тумани бўйича ИИО ФМБ ҳузуридаги Тергов бўлинмаси томонидан Достонга нисбатан Жиноят кодексининг 104-моддаси 3-қисми «д» банди (қасддан баданга оғир шикаст етказиш натижасида жабрланувчининг ўлимига сабаб бўлса) билан жиноят иши қўзғатилган.
Тергов ҳаракатлари жараёнида, ушбу жанжалнинг келиб чиқишига Достон ва Алишер ҳамда уларнинг ёнида бўлган шериклари «Самарқанд дарвоза» савдо маркази ёнида «ҳаво шарлари» сотиб турган вақтида жой талашишлари сабаб бўлгани аниқланган.
Ҳозирда ушбу жанжалда иштирок этган барча фуқароларнинг шахси аниқланиб, улар билан тегишли тергов ҳаракатлари олиб борилмоқда.
Аввалроқ Андижонда қўшни аёлни қарз бермагани ва устидан кулгани учун ўлдирган шахс 17,5 йилга қамалгани, Қашқадарёда маст эркак хотини ва қайнсинглисини пичоқлагани ҳамда бухоролик аёл рашк сабаб эрини пичоқлаб қўйгани ҳақида хабар берилганди.
Изоҳ (0)