O‘zbekiston va Qozog‘iston davlatlarini bog‘lovchi chegara hududda (G‘ishtko‘prik–Jіbek joli) 2021-yilning 10-aprel kuni “Markaziy Osiyo” xalqaro savdo iqtisodiy hamkorlik markaziga tamal toshi qo‘yish marosimi o‘tkazildi. Tadbirda O‘zbekiston bosh vaziri Abdulla Aripov va Qozog‘iston bosh vaziri Asqar Mamin ishtirok etdi. Bu haqda O‘zbekiston hukumati matbuot xizmati xabar qildi.
Tadbirda so‘nggi yillarda ikki davlat rahbarlarining o‘zaro ishonch va do‘stlikka asoslangan samimiy, iliq munosabatlari tufayli mamlakatlar o‘rtasida yaxshi qo‘shnichilik va strategik sheriklik aloqalari yanada mustahkamlanib borayotgani, prezidentlarning tashabbuslari va siyosiy irodalari tufayli ko‘p qirrali hamkorlik aloqalari yangi bosqichga ko‘tarilib, o‘zaro manfaatli loyihalar bilan boyitilayotgani ta’kidlandi.
Markaziy Osiyoda yagona bo‘lgan ushbu loyiha nafaqat ikki tomon uchun samarali bo‘lishi, balki mintaqada savdo-iqtisodiy aloqalar rivojiga ham qo‘shimcha turtki berishi ta’kidlandi.
Qozog‘istonga tashrif doirasida oliy darajada erishilgan kelishuvlarni amalga oshirish yuzasidan o‘zaro fikr almashish va ikki tomonlama hamkorlikning keyingi bosqichlarini muhokama qilish maqsadida ikki mamlakat hukumatlari delegatsiyalari ishtirokida ishchi yig‘ilishi ham o‘tkazildi.
Yig‘ilishda qardosh xalqlar manfaatlari yo‘lida savdo-iqtisodiy, transport-logistika, qishloq xo‘jaligi va boshqa sohalarda erishilgan kelishuvlarni izchil amalga oshirishning maqbul yo‘llari muhokama qilindi.
Bundan avval Abdulla Aripov Toshkentga kelgan Rossiya, Belarus, Qirg‘iziston, Tojikiston, Qozog‘iston, Ozarbayjon delegatsiyalari rahbarlarini qabul qilgani haqida xabar berilgandi.
Izoh (0)