17-mart kuni Toshkent shahri Olmazor tumanida 51 yoshli Doniyor ismli erkak 46 yoshli Bahodirga avtomashina oldi-sotdisi bilan shug‘ullanishini aytib, uning 63 ming dollarini qo‘lga kiritgan, deb xabar beradi Tergov departamenti.
Ma’lum qilinishicha, u Bahodirga qisqa fursatda ikkita Captiva-4 rusumli avtomashina olib berishni va’da qilgan va undan olgan 63 ming dollarni o‘z ehtiyojlari uchun sarflab yuborgan.
Mazkur holat yuzasidan Olmazor tumani bo‘yicha IIO FMB huzuridagi Tergov bo‘linmasi tomonidan Doniyorga nisbatan Jinoyat kodeksining 168-moddasi 4-qismi “a” bandi (firibgarlik, ya’ni aldash, ishonchni suiiste’mol qilish yo‘li bilan o‘zganing mulkini juda ko‘p miqdorda qo‘lga kiritish) bilan jinoyat ishi qo‘zg‘atilgan.
Hozirda tergov harakatlari olib borilmoqda.
Avvalroq Buxoroda fuqaroni ishga joylashtirish evaziga 700 dollar pora talab qilgan katta hamshira qo‘lga olingani, Sardoba suv ombori toshqinidan foyda ko‘rmoqchi bo‘lgan firibgar 3,5 yilga qamalgani hamda Samarqandda pullarini ko‘paytirib berishini aytib, fuqarolardan 22 250 dollargacha pul olib, qaytarib bermagan kompaniya aniqlangani haqida xabar berilgandi.
Izoh (0)