Ijtimoiy tarmoqlarda Navoiyda “Shifokorlar sabab biz onasiz qoldik” degan yozuvni ko‘targan holda murojaat yo‘llagan bolalarning ishi shahar prokuraturasi tomonidan o‘rganilmoqda, deb xabar beradi Bosh prokuratura.
Ma’lum qilinishicha, 25-mart kuni Navoiy viloyati Navbahor tumanida yashagan 36 yoshli ayol viloyat Perinatal markazining jonlantirish bo‘limida vafot etgan. Mazkur holat yuzasidan Navoiy shahar prokuraturasi tomonidan tergovga qadar tekshiruv harakatlari olib borilmoqda.
Tekshirishda sudga oid komission tibbiyot ekspertizasi tayinlangan. Ta’kidlanishicha, natijalari haqida xabar qilinadi.
Viloyat Sog‘liqni saqlash boshqarmasi ham ushbu holatga munosabat bildirgan bo‘lib, unga ko‘ra, 16-mart kuni Navoiy viloyat perinatal markazi ginekologiya bo‘limiga 12 haftalik homilasining nobud bo‘lgani bilan 1985-yilda tug‘ilgan O.F. murojaat qilgan.
Bemor bo‘limda davolash-tashxislash standartlari asosida to‘liq tekshiruvlardan o‘tkazilib, homilaning uch haftadan ortiq rivojlanmay qolgani, umumiy qon tahlilida leykotsitlar miqdori normadan oshgani inobatga olinib, septik asoratlarning oldini olish va antibiotiko-profilaktika maqsadida “Seftriakson” dori vositasining 1,0 grammi mushak orasiga sinamasidan so‘ng, inyeksiya o‘tkazish tavsiya berilgan.
16-mart kuni soat 17:50 lar atrofida muolaja hamshirasi tomonidan ushbu dori vositasi bilan o‘ng bilak sohasiga sinama qo‘ygandan keyin to‘satdan anafilaktik reaksiya, anafilaktik shok va klinik o‘lim holati kuzatilgan. O‘tkazilgan tezkor reanimatsion chora-tadbirlardan so‘ng, yurak faoliyati tiklanib, reanimatsiya bo‘limida uzaytirilgan sun’iy nafas berish apparatida intensiv davo muolajalari davom ettirilgan.
Davolash jarayonida 17, 23 va 25-mart kunlari mamlakatning malakali anesteziolog va reanimatologlari tomonidan ko‘rilib, kerakli tavsiyalar berilgan va buyurilgan tavsiyalar asosida davo muolajalari olib borilgan.
O‘tkazilgan intensiv davo muolajalariga qaramasdan 25-mart kuni bemor O.F.da biologik o‘lim qayd qilingan.
Avvalroq Jizzaxda chaqiruv bo‘yicha yetib kelgan shifokor xonadon egasining o‘g‘li tomonidan kaltaklangani, Samarqandda shifoxona qorovuli va shifokorini urgan shaxsga nisbatan jinoyat ishi qo‘zg‘atilgani hamda Farg‘onada tez yordam xodimlarini kaltaklagan shaxs qamoqqa olingani haqida xabar berilgandi.
Izoh (0)