Sobiq Milliy xavfsizlik xizmatining Toshkent shahar Yunusobod tumani Sayilgoh ko‘chasida joylashgan bosh qarorgohi ommaviy savdoga qo‘yildi. Bu haqda Davlat aktivlarini boshqarish agentligi matbuot xizmati xabar berdi.
Unga ko‘ra, savdo shartlaridan biri xaridor binodan kelgusida ofis, savdo-ko‘ngilochar va madaniy-hordiq kabi xizmatlar ko‘rsatish faoliyati bilan shug‘ullanishi belgilangan.
Qayd etilishicha, davlat aktivini sotish ikki bosqichda o‘tkaziladi.
Birinchi bosqichda talabgorlar oldindan saralanadi, jumladan, savdolarda qatnashish uchun talab qilingan hujjatlarning to‘liqligi, zakalat puli kelib tushgani, davlat aktividan kelgusida foydalanish yo‘nalishlariga qo‘yilgan talabga nisbatan talabgor tomonidan taklif etilgan biznes konsepsiyasi loyihasining maqbul yoki maqbul emasligi ko‘rib chiqiladi.
Ikkinchi bosqichda talabgorning tijorat takliflari (sotib olish narxi va to‘lovni amalga oshirish muddati) hamda to‘lov qobiliyati baholanadi.
Savdoda yuridik va jismoniy shaxslar ishtirok etishi mumkin. Bunda davlat aktivini sotib olish bo‘yicha birinchi bosqichda bitta taklif kelib tushgan hollarda savdolar o‘tkazilmagan, deb e’tirof etiladi.
Shuningdek, savdo yakunlari bo‘yicha savdo g‘olibi bilan Davaktiv agentligi tomonidan xabarnoma yuborilgan sanadan boshlab 20 kun ichida oldi-sotdi shartnomasi rasmiylashtiriladi (fors-major holatlari bundan mustasno) va savdolarga qatnashish uchun to‘langan zakalat puli davlat aktivi xarid to‘lovining bir qismi sifatida qabul qilinadi.
Davlat tender komissiyasi yoki ishchi organ o‘z xohishiga ko‘ra hech qanday majburiyatni o‘z zimmasiga olmagan holda har qanday vaqtda savdoni to‘xtatishi hamda savdo jarayonida talabgorlardan qo‘shimcha va yoki aniqlashtiruvchi ma’lumotlar so‘rashi mumkin.
Bundan avval Toshkentdagi Premier Hall kinoteatri 5 yilga ijaraga berilgani, Toshkent hokimligi “Navro‘z” to‘yxonasining buzilishiga izoh berilgani hamda Termizda quriladigan 20 mln dollarlik xalqaro savdo markazining tenderida aka-ukaga tegishli kompaniyalar qatnashgani ma’lum bo‘lgani haqida xabar berilgandi.
Izoh (0)