“Asossiz ma‘lumotlarga ishonmasligingizni so‘raymiz”. IIV O‘zbekistonga kelgan “kurdistonlik tabib” Ali Mahmud Hasan bo‘yicha fuqarolarni ogohlantirdi

O‘zbekiston Ichki ishlar vazirligi ijtimoiy tarmoqlarda “Toshkentga mashhur tabib Ali Mahmud Hasan keldi” deya tarqatilayotgan turli xabarlarga munosabat bildirdi.

Ta’kidlanishicha, mulla Ali Mahmud Hasan ismli shaxs muqaddas Qur’oni Karim oyatlarini o‘qigan holda tibbiyotda davolash imkoni bo‘lmagan (falaj, ko‘zi ojiz) kasalliklarni davolaganiga oid ma’lumotlar tarqatib, tarmoq foydalanuvchilarining e’tiborini o‘ziga tortib kelmoqda.

Ma’lum qilinishicha, bu kabi videolar tarmoq foydalanuvchilari orasida keng muhokamalarga sabab bo‘lib, shov-shuvga aylanib borayotgan, fuqarolarni tez to‘planib qolishiga olib kelayotgan holatlari kuzatilmoqda.

“Hurmatli fuqarolar, sizdan mish-mishlardan kelib chiqqan asossiz ma’lumotlarga ishonmasliklaringizni hamda karantin qoidalariga rioya qilishingizni so‘raymiz”, — deyiladi IIV xabarida.

Avvalroq O‘zbekiston Sog‘liqni saqlash vazirligi Mahmud Hasan Kurdistoniyning O‘zbekistonga kelganiga munosabat bildirib, fuqarolarni “muqaddas dinimiz nomidan foydalanib, soxta obro‘ orttirishga urinayotgan tovlamachilardan ehtiyot bo‘lish”ga chaqirgan edi.