“Innoprom — O‘zbekiston katta sanoat haftaligi” xalqaro sanoat ko‘rgazmasining birinchi kunida “O‘zbekneftgaz” AJ stendida Rossiya Federatsiyasining Chelyabinsk viloyati hukumati delegatsiyasi bilan muzokaralar o‘tkazildi.
Chelyabinsk viloyati gubernatorining o‘rinbosari Y. V. Kovalchuk boshchiligidagi delegatsiya tarkibidan mazkur hududning yirik sanoat korxonalari, xususan, “Ruseksport” MChJ, “Chelyabinskiy truboprokatniy zavod” MChJ, “Uralskiy avtomobilniy zavod” AJ, “Kopeyskiy mashinostroitelniy zavod” OAJ, “Uralspestmash” AJ, “Chelyabinskiy stroitelno-dorojniye mashini” YOAJ kabi korxonalarning rahbarlari o‘rin olgan.
Muzokaralar davomida Chelyabinsk viloyati korxonalari va “O‘zbekneftgaz” AJ o‘rtasida sanoat kooperatsiyasi aloqalarini kengaytirish, xususan, burg‘ilash, qazib olish va qayta ishlash jarayonlarida keng qo‘llaniladigan mahsulotlar, maxsus texnikalar, asbob uskuna va materiallarni yetkazib berish, birgalikda ishlab chiqarish va ta’mirlash istiqbollari muhokama qilindi.
Uchrashuvda mehmonlarga “O‘zbekneftgaz” AJ tizimida amalga oshirilayotgan transformatsiya jarayonlari, investitsiya loyihalari, xaridlar va tijorat yo‘nalishida olib borilayotgan komplayens tadbirlar bo‘yicha axborot berildi. Mahsulotlar, butlovchi qism va materiallarga bo‘lgan ehtiyojlarni onlayn o‘rganish maqsadida tashkil etilgan ung.cooperation.uz virtual ko‘rgazmasining imkoniyatlari haqida ma’lumotlar berildi.
Uchrashuv yakunida “O‘zbekneftgaz” AJ va Chelyabinsk viloyati sanoat korxonalari o‘rtasida hamkorlikni kengaytirish bo‘yicha bir qator amaliy kelishuvlarga erishildi.
Eslatib o‘tamiz, Chelyabinsk viloyati Ural federal okrugi tarkibidagi hudud bo‘lib, Yevropa va Osiyo mintaqasining chegarasida joylashgan. Mazkur hududda agrar-iqtisodiyot, qora metallurgiya, mashinasozlik, atom sanoati, kimyo, yengil sanoat, oziq-ovqat sanoati yo‘nalishidagi yirik ishlab chiqarish korxonalari joylashgan.
“Innoprom — O‘zbekiston katta sanoat haftaligi” xalqaro sanoat ko‘rgazmasi doirasida ikki tomonlama uchrashuvlar davom etmoqda.
“O‘zbekneftgaz” AJ matbuot xizmati
Izoh (0)