Buxoro viloyatining G‘ijduvon tumanida aliment to‘lashdan bo‘yin tovlab, qamalgan fuqaro M.K. yashirib qo‘ygan Cobalt’i topilgach, 19 million 520 ming so‘m qarzini to‘lab berdi. Bu haqda “Daryo”ga MIB G‘ijduvon tumani bo‘limi boshlig‘i Laziz Qahhorov xabar berdi.
Ta’kidlanishicha, fuqaro M.K. farzandi uchun 16 oy davomida 19 million 520 ming so‘m miqdoridagi aliment qarzdorligini to‘lashdan qasddan bo‘yin tovlab kelgan. Majburiy ijro byurosi G‘ijduvon tumani bo‘limi davlat ijrochisi tomonidan bir necha marotaba farzandlarining moddiy ta’minotini bajarishi yuzasidan ogohlantirilgan bo‘lsa-da, u qarzini to‘lamagan. Shundan so‘ng Jinoyat ishlari bo‘yicha G‘ijduvon tuman sudining ochiq sud majlisida unga nisbatan Ma’muriy huquqbuzarlik qo‘llanilgan. Va sud hukmiga ko‘ra, 15 sutkaga ma’muriy qamoq jazosi tayinlangan.
“Biroq fuqaroning o‘n besh sutkaga qamoqqa olingani uning kelgusida alimentdan kelib chiqqan qarzdorligini to‘lashdan ozod qilmaydi. Har bir ota turli mojaro va kelishmovchiliklar sababli oilasidan ajralgan bo‘lsa ham o‘z farzandi kelajagi uchun mas’ul va moddiy javobgar hisoblanadi”, — dedi Laziz Qahhorov.
MIB tomonidan fuqaro M.K. nomida Cobalt borligi aniqlangach, uning yashirib kelgan avtomashinasiga qidiruv e’lon qilingan. Qidiruv natijasida avtoulov topilgan va jarima maydonchasiga joylashtirilgan. Holat yuzasidan M.K.ga yana ma’muriy bayonnoma rasmiylashtirilgan.
Mashinasi olib qo‘yilgach, 16 oy davomida aliment to‘lovlarini to‘lashdan qasddan bo‘yin tovlab kelayotgan fuqaro 19 million 520 ming so‘m miqdoridagi aliment pullarini to‘lab bergan.
Izoh (0)