O‘zbekiston bosh vaziri Abdulla Aripov 5-aprel kuni Toshkent shahrida boshlangan “Innoprom. O‘zbekistonda katta sanoat haftaligi” xalqaro sanoat ko‘rgazmasiga tashrif buyurgan xorijiy mamlakatlar delegatsiyalari rahbarlarini qabul qildi, deb xabar beradi O‘zA.
Uchrashuvda Rossiya sanoat va savdo vaziri Denis Manturov, Yevrosiyo iqtisodiy komissiyasi sanoat va agrosanoat majmuasi bo‘yicha vaziri – kollegiya a’zosi Artak Kamalyan, Belarus sanoat vaziri Pyotr Parxomchik, Qirg‘iziston energetika va sanoat vaziri Kubanichbek Turdubayev, Tojikiston sanoat vaziri Sherali Kabirov, Qozog‘iston industriya va infratizimni rivojlantirish vaziri o‘rinbosari Amaniyaz Yerjanov, Ozarbayjon mudofaa sanoati vaziri o‘rinbosari Mehman Baxishov ishtirok etgan.
Rossiya sanoat va savdo vaziri D.Manturovga “Innoprom” sanoat haftaligini O‘zbekistonda o‘tkazish tashabbusini ilgari surgani, boshqa delegatsiyalar rahbarlariga esa ko‘rgazma doirasidagi tadbirlardagi ishtiroki uchun davlat rahbari Shavkat Mirziyoyevning samimiy minnatdorligi yetkazilgan.
Umumiy maydoni 12,5 ming kvadrat metrni tashkil etgan ko‘rgazma maydonida dunyoning 20 mamlakatidan 300 dan ortiq kompaniyaning mahsulot va xizmatlari namoyish etilmoqda. Anjuman dasturiga ko‘ra, 15 ga yaqin keng qamrovli tadbir, 200 dan ortiq biznes-uchrashuv o‘tkazilishi rejalashtirilgan.
Ta’kidlanishicha, “Innoprom” doirasida imzolanadigan investitsiyaviy va savdo kelishuvlari barcha sherik mamlakatlar manfaatini himoya qiladigan loyihalarni amalga oshirish imkonini yaratadi.
Avvalroq Shavkat Mirziyoyev Rossiya sanoat va savdo vaziri Denis Manturov boshchiligidagi delegatsiyani qabul qilgani to‘g‘risida xabar berilgandi.
Izoh (0)