Qashqadaryo viloyatining Mirishkor tumanidagi Guliston qishlog‘ida 10 gektar yer-maydoniga ega hududda “Yoshlar shaharchasi” tashkil etildi. Bu haqda “Daryo”ga tuman hokimligi axborot xizmati rahbari Azizbek Yazdurdiyev ma’lum qildi.
Yoshlar shaharchasi ochilishida ishtirok etgan tuman hokimi Sherali Sanayev hudud faqatgina paxta terimi mavsumida ikki oy terimchilar uchun xizmat qilganini ta’kidlagan.
“Tuman hokimi mazkur hudud 10 yil davomida foydalanilmasdan kelinganini, shuningdek, viloyat rahbari Zoir Mirzayevning tumanga tashrifi chog‘ida hududni yanada obod qilish va samarali foydalanish lozimligi haqida topshiriq berilganini esga olib, ‘Yoshlar shaharchasi’ qurilgani mirishkorliklar uchun quvonchli bo‘lganini bildirdi”, — deydi Azizbek Yazdurdiyev.
Ma’lumot berilishicha, shaharcha ochilgan kuni hududda 120 o‘rinli trikotaj mahsulotlarini ishlab chiqaruvchi “Mirishkor textile group” korxonasi ham o‘z faoliyatini boshlagan. Korxonada 100 dan ortiq “Ayollar va yoshlar” daftariga kiritilgan xotin-qizlarning bandligi ta’minlangan.
Shuningdek, shaharchada 60 o‘rinli 20-sonli bog‘cha, 3 nafar xotin-qiz bandligini ta’minlagan go‘zallik saloni, 5 nafar xotin-qizni ishli qilgan non va non mahsulotlari ishlab chiqaruvchi “Mirishkor eksport” xususiy korxonasi, aniq va tabiiy fanlar, ingliz hamda fransuz tillaridan yoshlarga qo‘shimcha dars berishga ixtisoslashgan “Bo‘lajak talaba” o‘quv markazi hamda tuman Aholi bandligiga ko‘maklashish markazi tomonidan tashkil etilgan kasb-hunarga o‘qitish markazi ish boshlagan.
Izoh (0)