Uzbekistan Airports AJ 15-apreldan havo kemalariga xizmat ko‘rsatish uchun yig‘im va tariflarni pasaytirish to‘g‘risida qaror qabul qildi. Bu haqda Transport vazirligi xabar qilmoqda.
Qayd etilishicha, asosiy yig‘im va tariflar o‘rtacha 27 foizga pasaytirilib, O‘zbekiston aeroportlariga muntazam yo‘lovchi reyslarini bajaradigan xorijiy aviakompaniyalar uchun qo‘llaniladi.
Pasaytirilgan yig‘im va tariflar xalqaro aviatsiya ma’lumotnomalarida e’lon qilindi. Bu bilan Fuqaro aviatsiyasi xalqaro tashkilotiga a’zo bo‘lgan 190 dan ortiq mamlakat va AIPdan foydalanuvchi barcha aviakompaniyalar O‘zbekiston aeroportlarida qo‘llaniladigan tariflar haqidagi ma’lumotlarga ega bo‘lishi uchun imkoniyat yaratildi.
“Qabul qilingan qaror O‘zbekiston aeroportlarining raqobatbardoshligini ta’minlash, turizmni rivojlantirish va ishlar samaradorligini rag‘batlantirish, aholi uchun havo transportidagi tashishlarni yanada arzon qilish uchun zamin yaratadi”, — deydi Uzbekistan Airports AJ boshqaruvi raisi Ra’no Jo‘rayeva.
Bundan avval O‘zbekistondagi aeroportlar davlat-xususiy sheriklik asosida rekonstruksiya qilingani, Navoiy xalqaro aeroporti MDHdagi “Eng yaxshi aeroport—2020” tanlovi g‘olibi bo‘lgani hamda Uzbekistan Airways bagaj tashish qoidalarini o‘zgartirgani haqida xabar berilgandi.
Izoh (0)